भक्तपुरका होटल र रेष्टुरेष्टमा प्रहरीको छापा, १६ पक्राउ

कपन अनलाइन

भक्तपुर, फागुन १८ ।  भक्तपुरका विभिन्न होटल, रेष्टुरेण्ट तथा खाजाघरबाट यौनजन्य गतिविधि गरेको अभियोगमा  प्रहरीले छापा मारेर १६ जनालाई पक्राउ गरेको छ ।

महानगरीय प्रहरी वृत्त जगातीको टोलीले पिसफुल, प्याराडाइज, कस्तुरी खाजाघर, ए–वान र थकाली खानाघरमा छापा मारी अनैतिक कार्य गर्दै गरेको अवस्थामा ८ पुरुष र ८ महिलालाई शनिबार पक्राउ गरेको हो ।

जगाती क्षेत्रका होटल तथा रेष्टुरेष्टमा यौनजन्य गतिविधि भइरहेको गुनासो आएपछि छापा मारेर उनीहरुलाई पक्राउ गरिएको प्रहरी नायब उपरीक्षक चक्रराज जोशीले बताए । अरनिको राजमार्ग आसपासमा खुलेका केही होटलजन्य व्यवसायमा कानून विपरीतका गलत कार्य हुँदै आएको गुनासो बढेपछि प्रहरीले छापा मारेको हो ।

नियन्त्रणमा लिएका महिला तथा पुरुषलाई प्रहरी सामाजिक मनोपरार्मश समेत दिएको र उनीहरुलाई पहिलोपटक चेतावनी दिएर छाडिने उनले बताए । अरनिको राजमार्ग खण्डकै ठूला होटल र ठूला होटलभित्र कटेज बनाएर यौनधन्दा चलाउँदै आएका होटल रेष्टुरेष्टमा भने प्रहरीले छापा नमार्ने गरेको गुनासो स्थानीयको छ ।