रकम ठगी र बैंक तथा वित्तिय संस्थाहरु ह्याक गरेको अभियोगमा ३ जना पक्राउ

पक्राउ पर्नेहरुमा दोलखा फुलपा ठेगाना भएका ५२ वर्षीय रमेश खड्का, नवलपरासी रामग्राम नगरपालिका-१७ ठेगाना भएकाहरु ३७ वर्षीय विशेश्वर प्रसाद तिवारी र संदिप कलवार रहेका छन् । साथै ठगी कार्यमा नाइजेरियन नागरिक पिटर हरम्यान एसेन्जा, स्मीत मोरिस र १० जना भारतीय नागरिकहरुको समेत संलग्नता रहेको महानगरीय अपराध महाशाखा टेकुले जनाएको छ ।

नाईजेरियन तथा भारतीय नागरिकहरूले भारतको दिल्ली, मुम्बई, पाकिस्तान, चीन, तान्जानिया, इथोपिया तथा बेलायतमा बसी नेपालका नागरिकहरूलाई एजेण्ट बनाई लामो समयदेखि विभिन्न सामाजिक संजाल प्रयोग गरी अनलाईनको माध्यमबाट चिठ्ठा परेको र पार्सल आएको छ भनी प्रलोभनमा पारी करोडौं रकम ठगी गर्नुका साथै नेपालका बैंक तथा वित्तिय संस्थाहरू समेत ह्याक गर्ने कार्यमा संलग्न रहेको अभियोगमा उनीहरुलाई महाशाखाबाट खटिएको प्रहरीले पक्राउ गरेको हो ।

ठगी तथा ह्याक गरेको रकम नेपालका विभिन्न बैंक तथा वित्तिय संस्थाहरू मार्फत कारोवार गर्नुको साथै उक्त रकमको १५ देखि २० प्रतिशत नेपाली नागरिकलाई दिई बाँकी सम्पूर्ण रकम विभिन्न माध्यमबाट भारत पठाउने गरेको, नेपालमा उक्त कामका लागि ४० भन्दा बढी नेपाली एजेण्टहरु परिचालन गरेको, नेपाली एजेण्टहरूलाई उक्त कार्य गर्नको लागि विभिन्न बैंकमा खाता खोल्न लगाई एउटै एजेण्टबाट ६ वटा भन्दा बढी बैंक खाताबाट कारोवार गरेको र हालसम्म १४ करोड ६७ लाख ९१ हजार रुपैयाँ शंकास्पद रुपमा कारोबार गरेको तथा नेपालका कृषि विकास बैंक र पानश रेमिट ह्याक भएको तथा अन्य १७ वटा बैंक उक्त ठगी कार्यका लागि प्रयोग भएको प्रारम्भिक अनुसन्धानबाट खुल्न आएको छ ।

पक्राउ परेका उनीहरुलाई आवश्यक कारवाहीका लागि महानगरीय प्रहरी परिसर काठमाडौं पठाइएको उक्त महाशाखाले जनाएको छ ।