एसएसबीले सामान ल्याउन नदिँदा राजश्व घट्यो

कपन अनलाइन

कञ्चनपुर, २२ माघ   ।  बेलौरी नगरपालिकामा रहेको बेलौरी छोटी भन्सार कार्यालयको राजश्व संकलनमा कमी आएको छ । भारततर्फ भन्सार कार्यालय नहुँदा भारतीय सीमा सुरक्षा बल (एसएसबी)ले सामान ल्याउन नदिँदा राजश्व घटेको हो । मासिक लाखौँको राजश्व उठ्ने छोटी भन्सार कार्यालयमा मुस्किलले  ४० हजारदेखि ८० हजारसम्म मात्रै राजश्व उठ्ने गरेको छ ।

भारतीय सुरक्षाकर्मीले व्यापारीलाई सामान ल्याउन नदिँदा राजश्वमा कमी आएको छोटी भन्सार कार्यालयका कर्मचारी वीरसिंह धामीले बताए । केही घरायसी सामान ल्याउन भने भारतीय सुरक्षाकर्मीले छुट दिने गरेका छन् । दैनिक  ५०० देखि  एक हजारसम्म राजश्व उठ्ने गरेको धामीले बताए ।

चालू आवको साउन महिनामा  ५० हजार, भदौमा ७८ हजार, असोजमा  ८४ हजार, कात्तिकमा  ६९ हजार, मंसिरमा ५१ हजार र पुसमा ४८ हजार राजश्व संकलन भएको छ । भारतीय सुरक्षाकर्मीसँगको मिलेमतोमा केही व्यक्तिले भन्सार छल्दै भारतबाट ठूलो मात्रामा सामान भित्र्याउने गरेकाले पनि राजश्व संकलनमा कमी आएको स्थानीय बासिन्दा बताउँछन् ।

नायब सुब्बाको दरबन्दी रहेको उक्त छोटी भन्सार कार्यालय लामो समयदेखि सहयोगीका भरमा सञ्चालन हुँदै आएको छ । लामो समयदेखि भन्सारको कामकाज दुई जाना कार्यालय सहयोगीले सञ्चालन गर्दै आएका छन् ।

गड्डाचौकी कार्यालयले सहयोगीलाई पालैपालो छोटी भन्सार कार्यालयमा खटाउँदै आएको छ । आफू खुशी भन्सारमा राजश्व बुझाउनेबाट मात्रै राजश्व लिने गरेको कार्यालय सहयोगी वीरसिंह बोहराले बताए। द्वन्द्व अघि विस्थापित बेलौरी छोटी भन्सार कार्यालय पुनः स्थापना भएर कार्य सञ्चालन भए पनि भरपर्दो सुुरक्षा व्यवस्था छैन । बिहान १० बजेदेखि साँझ ६ बजेसम्म दुईजना सशस्त्र प्रहरीका जवानले सुरक्षा दिने भए पनि साँझ ६ बजेपछि भन्सार कार्यालय सुरक्षाविहीन हुने गरेको छ । कर्मचारी असुरक्षाको कारण राति भन्सार कार्यालयमा बस्दैनन् ।

कार्यालयका संरचना जीर्ण बन्दै काम गर्न समेत कर्मचारीलाई गाह्रो छ । भन्सार कार्यालय सञ्चालनका लागि वर्षौं पहिले निर्माण गरिएका भौतिक संरचनाको संरक्षण र संवद्र्धनको कार्य नगरिँदा जीर्ण बनेका हुन । दुई तले एक र अन्य दुई भवन छोटी भन्सार कार्यालयसँग रहेका छन् । दुई तले भवन वर्षौं पहिले निर्माण भएको भवन जुनसुकै बेला भत्कने अवस्थामा छ ।

भन्सार कार्यालयसँग रहेको चार बिगाहा १७ कट्ठा जग्गा प्रयोगविहीन छ । एक सय वर्षभन्दा पुरानो छोटी भन्सार कार्यालयको स्तरोन्नतिको कार्य गरी भन्सारका रुपमा परिणत गरी भारतसँगको नाका खुलाउनु पर्ने स्थानीय बासिन्दाले जोडदिएका छन् । भारतसँगको बेलौरी नाका खुला गरेमा यस क्षेत्रको आर्थिक समृद्धिमा टेवा पुग्ने देखिन्छ । विसं २०२९ मा बेलौरीबाट जिल्ला सदरमुकाम महेन्द्रनगर सारिएपछि छोटी भन्सार कार्यालयको स्तरोन्नति हुन सकेको छैन ।