बालिकालाई जबरजस्तीकरणी गर्ने जेल चलान

कपन अनलाइन

काठमाडौँ, ११ माघ । बालिकालाई जबरजस्तीकरणी गरेको आरोपमा पक्राउ परेका नेपाली सेनाका मेजर प्रभवविक्रम शाहलाई पुर्पक्षका लागि जेल चलान गरिएको छ । उनी बागलुङको २३ नम्बर बाहिनीमा कार्यरत् थिए ।

काठमाडौं जिल्ला अदालतले बिहीबार दिएको आदेश अनुरुप उनलाई बिहीबार जेल चलान गरिएको महानगरीय प्रहरी वृत्त, बानेश्वरका प्रहरी नायब उपरीक्षक (डिएसपी) रवि पौडेलले बताए ।

गत १४ पुसमा बुद्धनगरस्थित आफन्तको घरमा १४ वर्षीय बालिकालाई जबरजस्तीकरणी गरेको पीडितको उजुरीका आधारमा उनलाई पक्राउ गरिएको थियो । शाहबिरुद्ध जबरजस्तीकरणी मुद्दा अन्तरगत बाल यौन दुराचार सम्बन्धी कसुरमा मुद्दा चलाइएको थियो ।