रियल मड्रिडद्वारा गेटाफे पराजित

कपन अनलाइन 

खेलमा रियल मड्रिडलाई जिताउन करिम बेन्जिमा र क्रिष्टियानो रोनाल्डोले गोल गरे। गेटाफेका लागि मोलिनाले एक गोल फर्काए। ३९ औं मिनेटमा बेन्जिमाले गोल गर्दै पहिलो हाफमा रियल मड्रिडलाई १–० को अग्रता दिलाए।

तर ५६ औं मिनेटमा मोलिनाले गेटाफेका लागि बराबरी गोल फर्काए । रियल मड्रिडले त्यसपछि विजयी गोलका लागि खेलको अन्तिम समय सम्म पर्खिनु पर्यो।

८५ औं मिनेटमा रोनाल्डोले इस्कोको सुन्दर पासमा विजयी गोल गरे। त्यसअघि रोनाल्डोले गोल गर्ने सुन्दर मौका गुमाएका थिए। रोनाल्डोले यो सिजन ला लिगामा पहिलो गोल गरेका हुन्।

प्रतिबन्धका कारण सुरुका चार खेल गुमाएका रोनाल्डोले ४ खेलमा एक गोल गरेर खाता खोलेका हुन्। जितपछि ८ खेलबाट १७ अंकसहित रियल मड्रिड दोस्रो स्थानमा उक्लिएको छ। शीर्ष स्थानको बार्सिलोनाको पाँच अंक बढी २२ अंक भएको छ। १६ अंक रहेको एथ्लेटिको मड्रिड तेस्रो स्थानमा छ।

राति भएको खेलमा एथ्लेटिको बिल्बाओसँग १–० ले पराजित भएको सेभिल्ला भने चौथो स्थानमा झरेको छ। उसको ८ खेलबाट १६ अंक भएको छ। अर्को खेलमा रियल सोसिडाडले एलाभेसलाई २–० ले हरायो।