नागरीक वडा मञ्च गठन हुन नसक्दा चिन्तित छन् सचिव मुकुन्द खड्का
कपन अनलाइन, १० मंसिर, २०७३
बुढानिलकण्ठ नगरपालिका वडा नं १३, १४, १८ र १९ मा अझै नागरीक वडा मञ्च गठन हुन सकेको छैन । यसरी नागरीक वडा मञ्चको गठन हुन नसक्नुमा यहाँका दलहरुबीच भागवण्डा नमिलेर हो भन्ने कुरा पनि सतहमा आइसकेको छ । यी वडाका संयुक्त वडा सचिवको हैसियतले पटक पटक मञ्च गठनका लागि प्रयास गरेर हैरान भएका मुकुन्द खड्का आफू आजित भैसकेको बताउँछन् ।केही दिनअघि वडा नं १३ र १८ मा करिब करिब गठन भैसकेको थियो तर राप्रपा नेपालका श्याम केसीले यो यो वडामा यति यति मानिस राखिदिनु पर्यो भनेर पत्र पठाउनको साथै गठन पक्रियालाई अबरुद्ध बनाएपछि रोकिएको प्रक्रिया अझै चलिरहेको छ । ४ दिन अघि पनि अर्को प्रयास गरिएको थियो यी वडामा । तर यसपाला पनि राप्रपाले नै अबरुद्ध गर्यो यो यो मानिसलाई समाहित गरेमात्र कार्यक्रम हुन दिने नत्र नदिने भनेर । वडा कार्यालय प्रांगणमा भएको कार्यक्रममा राप्रपाले सम्बन्धित मानिसहरुभन्दा भाडाका गुण्डाहरु पठाएर माइन्यूट च्यात्ने प्रयास गरे पछि प्रक्रिया अबरुद्ध भएको थियो ।
बुनपाभित्रको महत्वपूर्ण वडाहरुको रुपमा लिइने यी चारवटा वडामध्ये १३, १८ र १९ मा नेपाली , कांग्रेस, एमाले र माओवादी केन्द्रबीच खासै समस्या नरहेको बताइएको छ भने राप्रपाले आफ्नो उपस्थिति देखाउन पटक पटक गुण्डागर्दी गर्ने प्रयास गरेको देखिन्छ ।
वडा नं. १४ मा भने एमाले, कांग्रेस र माओवादी केन्द्र तीनै पार्टीले आफू संयोजक हुनुपर्छ भन्ने अडान राख्दा गठन प्रकृया भाँडिँदै आएको छ । दलहरुको यस्तो अर्कमण्यता र राप्रपाको गुण्डागर्दी बारेमा सचिव मुकुन्द खड्का खासै केही भन्न रुचाउँदैनन् तर नागरिक वडा मञ्च गठन नहुँदा यी वडाहरुमा पर्ने विकास निर्माण लगायत अन्य विषयको प्रभावप्रति भने चिन्तित छन् । राजनीतिक दलहरुको भागवण्डामा नमिल्दा जनताहरुले विकास निर्माणको कुनै कुरामा वञ्चित हुन नपरोस् भनेर आफूले पटक पटक मञ्च गठनमा जोड दिएको बताउँछन् उनी । दलहरुले अलिकति सुझबुझपूर्ण काम गर्न सके यी वडाहरुमा नागरीक वडा मञ्च गठन हुन गारो नभएको खड्काको ठम्याई छ ।
