एपिएफ फाइनलमा
कपनअनलाइन, सुरुङ्गा(झापा), ९ मङ्सिर ।
झापाको सुरुङ्गामा जारी सहारा सुरुङ्गा गोल्ड कप फुटबल प्रतियोगिताअन्तर्गत हिजो भएको खेलमा नेपाल पुलिस क्लबलाई हराउँदै सशस्त्र प्रहरीको एपिएफ फाइनलमा पुगेको छ ।
सुरुङ्गामा जारी सहारा सुरुङ्गा गोल्ड कप फुटबल प्रतियोगिता चौथो संस्करणअन्तर्गत हिजो भएको खेलमा नेपाल पुलिस क्लबलाई हराउँदै एपिएफ फाइनलमा प्रवेश गरेको हो । निर्धारित समयमा दुवै तर्फबाट गोल नभएपछि खेलको निर्णय ट्राइबेकरबाट भएको थियो । जसमा एपिएफले पुलिसलाई टाइब्रेकरमा ५–४ गोल अन्तरले पराजित गरेको थियो ।
एपिएफका नवीन लामा, आदित्य चौधरी, मिलन राई, पासङ लामा र रञ्जन विष्टको प्रहार गोलमा परिणत भयो । पुलिसका विक्रम धिमाल, दिनेश गुरुङ, तेज तामाङ र दिनेश राजवंशीले गोल गरे भने बुद्ध लामाले पोष्ट बाहिर प्रहार गरेका थिए ।
बिहीबार रुपन्देही–११ र मनाङ मस्र्याङ्दीबीचको खेलमा विजयी हुने टोलीसँग एपिएफले फाइनलमा प्रतिष्पर्धा गर्नेछ ।
खेलमा उत्कृष्ट प्रदर्शन गरेका एपिएफका राजेन्द्र रावल म्यान अफ म्याच घोषित भए । प्रतियोगिताको विजेताले रु तीन लाख ५१ हजार १११ र उपविजेताले रु दुई लाख ५१ हजार १११ पाउने आयोजक सुरुङ्गा जेसीजका अध्यक्ष भीम भट्टराईले जानकारी दिनुभयो । रासस
