सीमा क्षेत्र विकास कार्यक्रम सुरु

कपन अनलाइन, भद्रपुर, १ मङ्सिर ।

जिल्लाका सीमाक्षेत्रका गाविस तथा नगरपालिकामा यस वर्षदेखि सीमाक्षेत्र विकास कार्यक्रम सुरु भएको छ ।

भारतीय सीमासँग जोडिएका भद्रपुर र मेचीनगर नगरपालिका तथा गौरीगन्ज, घेराबारी, केचना, खजुरगाछी, कोरोबारी, कुमरखोद, महाभरा, पथरिया, राजगढ, शरणामती, टागनडुब्बा, बाहुन्डागी, बनियानी, ज्यामिरगढी, पाठामारी र पृथ्वीनगर गाविसमा सो कार्यक्रम सुरु भएको हो ।

भद्रपुर नगरपालिका– १, ३, ५ र ७ वडा तथा मेचीनगर नगरपालिका– ८, १० र ११ वडामा सञ्चालन हुने उक्त कार्यक्रमका लागि जिल्ला विकास समितिले रु पाँच करोड १३ लाख ९३ हजार बजेट विनियोजन गरेको स्थानीय विकास अधिकारी खेमराज ओझाले बताउनुभयो । गाविसमा प्रतियोजना कम्तीमा रु पाँच लाखभन्दा बढी र नगरपालिकामा प्रतियोजना रु आठ लाखभन्दा बढी लागतका योजना छनोट गर्न सम्बन्धित गाविस र नगरपालिकालाई निर्देशन दिएको उहाँले बताउनुभयो । रासस