बुढानिलकण्ठ नगरपालिकाले गोकर्णेश्वरसँग सहीदपार्क दावी गर्ने
कपन अनलाइन, १३ भदौ, २०७३
साविक कपन गाविसको नापीको श्रेस्तामा गोकर्णेश्वर नगरपालिकामा रहेको सहीदपार्क देखिएपछि बुढानिलकण्ठले सो पार्कमा आफ्नो दावी गर्ने भएको छ । सहीदपार्कका एकतिहाई भाग बुनपामा पर्ने देखिएपछि बुनपाले आधिकारिकरुपमा सो पार्कमा आफ्नो दावी प्रस्तुत गर्न लागेको हो ।
निर्माणाधिन सहिदपार्क राजधानीको महत्वपूर्ण स्थल हुने भएकोले सो पार्कभित्र बुनपाको वडा नं. १९ को क्षेत्रफल पर्ने भएका कारण दावी गर्नु वाञ्छनीय भएको बुनपा कार्यकारी अधिकृत विश्वराज मरासेनीले कपन अनलाइनलाई बताए । मरासेनीका अनुसार कपन गाविसको पुरानो सिमा अध्ययन गर्दा गोकर्णेश्वर नगरपालिकामा रहेको भनिएको सहीदपार्क बुढानिलकण्ठ नगरपालिकामा पनि पर्ने भएकोले सशक्त दावी गरी आफ्नो परिचय स्थापनामा पहल गरिने बताए ।
कार्यकारी अधिकृतको यो दावीमा बुनपाभित्रको सहजीकरण समितिले सबैको सम्मति रहेको छ । यो परिचयको विषय हो किन छाड्ने माओवादी केन्द्रका रविन अधिकारीले बताए । यो परिचयसँगै यसबाट भोलि हुने आम्दानी तथा अन्य विषयसँग सम्बन्ध हुने भएकाले जसरी पनि सो पार्क दुइवटै नगरपालिकामा रहेको भनेर सरकारी अभिलेख तयार गर्न पहल गरिने अधिकारीले बताए ।
यो विषयमा नेकाका राजराम बुढाथोकी, एमालेका विदुरविक्रम खड्कालगायत नयाँशक्ति नेपालका शिब बजगाइँसमेतले समान विचार रहेको छ । यसअघि आज बुनपा कार्यकारी अधिकृत मरासेनीसहित सहजीकरण समितिका प्रमुख दलहरु सिमा निरीक्षणमा निक्लिएका थिए ।
