राष्ट्रिय महिला भलिबल ः त्रिभुवन आर्मी क्लब विजयी
काठमाडौँ, २ पुस । सर्वाधिक पुरस्कार राशि भएको ढोरपाटन ब्ल्यू स्काई राष्ट्रिय महिला डबल लिग भलिबल प्रतियोगिताअन्तर्गत आज भएको खेलमा त्रिभुवन आर्मी क्लब विजयी भएको छ ।
नयाँ बसपार्कमा भएको उक्त प्रतियोगितामा आर्मीले बुटवलको एभरेस्ट बोर्डिङ स्कूललाई ३–० को सोझो सेटमा पराजित गर्दै विजयी भएको हो । आर्मीले एभरेस्टलाई पहिलो सेट २५–१६, दोस्रो सेट २५–१८ र तेस्रो तथा अन्तिम सेट २५–१० ले पराजित गर्दै प्रतियोगितामा जित हासिल गरेको हो ।
ढोरपाटन स्पोर्ट्स क्लबले आयोजना गरेको उक्त प्रतियोगितामा विभिन्न १३ टोलीको सहभागिता रहेको छ । प्रतियोगितामा पहिलो स्थान हासिल गर्ने टोलीले रु दुई लाख ६० हजार प्राप्त गर्नेछ भने दोस्रो हुने टोलीले रु एक लाख ३० हजार पाउनेछ ।
त्यस्तै, प्रतियोगितामा तेस्रो स्थान हासिल गर्ने टोलीले रु ७० हजार प्राप्त गर्नेछ भने चौथो स्थान हासिल गर्ने टोलीले रु ४० हजार प्राप्त गर्नेछ ।
प्रतियोगितामा उत्कृष्ट खेलाडी, प्रतिभावान् खेलाडी, वुमन अफ द सिरिजल र वर्ष खेलाडी घोषित हुनेले जनही एक–एक थान स्कुटर प्राप्त गर्नेछन् । रासस
