फोटो कथा सिन्धुपाल्चोकका जनताले दिए काठमाडौं लाई निशुल्क दाउरा

२७ मंसिर २०७२, आईतवार

अशोकराज पाण्डे, २७ मङ्सिर, काठमाडौँ । आफै भुकम्पको पीडाबाट कठोर जीवन झेलिरहेका सिन्धुपाल्चोकका जनताले छिमेकी भारतले लगाएको नाकाबन्दीको कारण खाना पकाउने ग्यासको अभाव र मँहगोमा दाउरा किन्नुपर्ने बाध्यतामा छट्पटिरहेका काठमाडौंवासीलार्इ े निशुल्क दाउरा पठाएका छन् ।

सिन्धुपाल्चोकका इचोक, महाँकाल, किउल, मेलम्ची नगरपालिका लगायतका क्षेत्रबाट भुकम्प पीडितहरुले प्रति घर २० केजीका दरले दाउरा संकलन गरी सिन्धुपाल्चोक एमालेका पूर्व अध्यक्ष हस्त पण्डित तथा सासंद शेरबहादुर तामाङ्गलाई बुझाएका थिए ।

उक्त दाउरा हिजो सिन्धुपाल्चोकबाट काठमाडौ ल्याईएको थियो । हिजो नै बाँड्ने कार्यक्रम बनाईएतापनि साँझ परिसकेकाले र दाउरा लिने जनताको संख्या धेरै भएकाले बाँड्न असम्भव देखिएपछि उपस्थितहरुलाई कुपन वितरण गरी आज बिहान स्थानीय प्रशासनको मद्दतमा बिहान ७ बजेबाट काठमाडौं महानगरपालिका ६, महाँकाल पानी ट्याङ्कीबट करिब ७०० परिवारलाई वितरण गरिएको थियो ।

दाउरा वितरण कार्यक्रममा सिन्धुपाल्चोक एमालेका पूर्व अध्यक्ष पण्डित र सिन्धुपाल्चोक क्षेत्र नम्बर ३ का सांसद तामाङ्गको पनि उपस्थिति थियो ।

ओखलढुङ्गा स्थायी घर भएकी महाँकाल, बौद्ध निवासी मनकुमारी न्यौपानेले २० किलो दाउराले धेरै समय नपुगेपनि सहयोग सकारात्मक भएको बताउँदै दाउरा वितरण गरिरहेका व्यक्तिहरुलाई धन्यवाद दिइन् । सिन्धुपाल्चोकका जनताको यो सराहनीय कदमको सामाजिक सञ्जाल लगायत विभिन्न सञ्चारमाध्यममा प्रशंसा भएको छ ।

यस्तो कदम काठमाडौं नजिकका अन्य जिल्लाहरुले पनि अनुसरण गर्न सकेमा काठमाडौंमा देखिएको खाना पकाउने इन्धनको समस्या केहि हदसम्म भएपनि समाधान हुने सरोकारवालाहरु बताउँछन् ।