विराटनगर–जोगवनी नाका खुल्दै

विराटनगर, १७ असोज । दश दिनदेखि पूर्णरुपमा बन्द जोगवनी–विराटनगर नाका साँझदेखि खोलिने भएको छ ।

विराटनगर रानी भन्सार कार्यालयका प्रमुख कृष्ण बस्नेत र भारत जोगवनी भन्सारका प्रमुख प्रनेश गुप्ताबीच आज छलफल भई पाँचबुँदे सहमति भए मुताबिक नाका खोल्न लागिएको हो ।

सामान जाँचको प्रक्रियालाई सहज बनाउने, ग्यास, इन्धन, खाद्यान्न र औषधिलगायत सामानलाई सहज रुपमा आपूर्तिको व्यवस्था मिलाउने, नेपालतर्फ भारतीय गाडीको सुरक्षाको प्रबन्ध मिलाउने र भन्सार उद्योग वाणिज्य सङ्घको सहायता कक्ष (हेल्प डेस्क) राख्नेलगायतको सहमति भएको विराटनगर भन्सार कार्यालय प्रमुख बस्नेतले बताउनुभयो ।

सो क्षेत्रमा करिब सात सय विभिन्न मालवाहक गाडी रोकिएर रहेको बताइएको छ ।