बुढानिलकण्ठ -३ सुजन श्रेष्ठको घरमा चोरी गर्ने दुई जना पक्राउ

कपन अनलाइन

काठमाण्डौ ,साउन २०।

बुढानिलकण्ठ नगरपालिका वडा नं ३ मा रहेको सुजन श्रेष्ठको घरमा चोरी गर्ने दुई जनालाई प्रहरीले पक्राउ गरेको छ।

साउन ६ गते रातिको १२:०० बजे देखि ३:०० बजेको समयमा बुनपा   वडा नं. ३ गैरीगाउँ स्थित सुजन श्रेष्ठको घरबाट Rolex, Rado र Omega घडी, सुनका तथा हिराका बिभिन्न गरगहना तथा नगद लगायत अन्दाजी मुल्य रू ८५,२६,९००/- बराबरको धनमाल चोरी भएको घटनाको अनुसन्धानको क्रममा उक्त चोरी भएको धनमालहरु पासा भन्ने बिकाश पोडेको साथमा रहेको भन्ने खुल्न आएको प्रहरीले जानकारी दिएको छ।

अनुसन्धान पश्चात उनलाई साउन १८ गते  ठमेलबाट पक्राउ गरी थप अनुसन्धान गर्दा उक्त चोरी गर्ने कार्यमा हाल प्रहरी वृत, मालिगाउँमा अभद्र व्यवहार कसुरको अनुसन्धानको सिलसिलामा थुनामा रहेका सुमन भन्ने बिष्णु श्रेष्ठको संलग्नता रहेको खुल्न आएको हुँदा निज पासा भन्ने बिकाश पोडेलाई थप अनुसन्धान तथा कारबाहीको लागी प्रहरी वृत, महाराजगञ्ज पठाइएको छ  ।