कागेश्वरीको मुलपानी क्रिकेट मैदानमा अन्तर्राष्ट्रिय क्रिकेट प्रतियोगिता हेर्ने सपना पुरा हुने
कपन अनलाइन
काठमाडौं चैत्र ७ । कागेश्वरीको मुलपानी क्रिकेट मैदानमा अन्तर्राष्ट्रिय क्रिकेट प्रतियोगिता हेर्ने सपना पुरा हुने भएको छ । मुलपानी क्रिकेट मैदानमा २०२३ अप्रिल/मे मा नेपाल सहित १० राष्ट्र सम्मिलित हुने एसीसी पुरुष प्रिमियर कप अन्तराष्ट्रिय क्रिकेट प्रतियोगिता संचालनको लागि छलफल गरिएको छ ।कागेश्वरी मनोहरा नगरपालिका नगर प्रमुख उपेन्द्र कार्की र नेपाल क्रिकेट संघ(क्यान) का अध्यक्ष चतुर बहादुर चन्द बिच मुलपानी क्रिकेट मैदानमा नेपाल सहित १० राष्ट्र सम्मिलित हुने एसीसी पुरुष प्रिमियर कप अन्तराष्ट्रिय क्रिकेट प्रतियोगिता संचालनको लागि वृहत छलफल गरिएको हो ।
नेपाली क्रिकेटलाई अन्तर्राष्ट्रिय स्तरमा चिनाउन, आन्तिरक प्रतियोगिता बढाउन र खेलाडीमा थप निखारता ल्याउन मूलपानी क्रिकेट मैदानलाई सबैले आशाको केन्द्रका रुपमा हेरेका छन् । सर्वाधिक चासो र प्रतीक्षा गरिएको पहिलो पूर्ण सुविधा सम्पन्न अन्तर्राष्ट्रिय क्रिकेट मैदान लाई छिटो सम्पन्न गर्नको लागि कागेश्वरी नगरपालिकाका मेयर उपेन्द्र कार्कीले निरन्तर पहल गरिरहेको जानकारी गराएका छन ।
