विश्वकप फुटबलको अनलाइन सट्टाबाजीको आरोपमा बुढानिलकण्ठका एक सहित दुई जना पक्राउ

कपन अनलाइन
काठमाडौं, मंसिर २६।

अनलाइन मार्फत विश्वकप फुटबल तथा अन्य खेलहरूको सट्टाबाजी गरेको आरोपमा प्रहरीले दुई जनालाई पक्राउ गरेको छ।

पक्राउ पर्नेहरूमा काठमाडौं महानगरपालिका नरदेवी बस्ने भारत राजस्थान प्रदेश चुरू सृजनगढ ठाना घर भएका ३२ वर्षीय पवन कुमार शर्मा र काठमाडौं बुढानिलकण्ठ नगरपालिका–८ कपन बस्ने पाल्पा रैनादेवी छहरा गाउँपालिका–४ घर भएका ३७ वर्षीय रूद्र प्रसाद पोखरेल रहेका छन्।

काठमाडौंका विभिन्न स्थानमा लुकिछिपी अनलाइन सट्टाबाजी भइरहेको भन्ने सूचनाको आधारमा काठमाडौं उपत्यका अपराध अनुसन्धान कार्यालयबाट खटिएको प्रहरीले पोखरेललाई जमलबाट र शर्मालाई नरदेवीबाट पक्रा गरेको हो।

उनीहरूविरुद्ध सट्टाबाजी गर्न गराउन नहुने कसुर अन्तर्गत थप अनुसन्धान एवं कारबाहीको लागि जिल्ला प्रहरी परिसर टेकु काठमाडौं पठाइएको छ।