पूर्वाञ्चलमा एन्टिस्नेक भेनम पर्याप्त मात्रामा
विराटनगर, २१ जेठ । विषालु सर्पको डसाइपछि आवश्यक उपचारमा प्रयोग गरिने प्रतिरोधात्मक औषधि (एन्टिस्नेक भेनम) पूर्वाञ्चलमा पर्याप्त मात्रा मौज्दात रहेको छ ।
पूर्वाञ्चलको खासगरी तराईका झापा, मोरङ, सुनसरी, सप्तरी र सिरहा जिल्लास्थित अस्पताल र सर्पदंश केन्द्रमा मागबमोजिम पठाइ सकिएको र हाल एक हजार २०० थान भायल मौज्दात रहेको विराटनगरस्थित पूर्वाञ्चल क्षेत्रीय मेडिकल स्टोरले जनाएको छ ।
गर्मी र वर्षाको आगमनसँगै तराईका जिल्लामा विषालु सर्पको बिगबिगी बढ्ने गरेको र मानिसलाई सर्पले डसेपछि अनाहक मृत्यु हुने गर्दछन् ।
यस स्टोरबाट मङ्गलबार धरानस्थित बिपी कोइराला स्वास्थ्य विज्ञान प्रतिष्ठानमा ५०० भायल पठाइएको स्टोरका प्रमुख भरत साहले जानकारी गराउनुभयो ।
त्यस्तै विराटनगरस्थित कोसी अञ्चल अस्पतालमा २१० भायल, लहान अस्पतालमा १०० भायल, चारआली सर्पदंश केन्द्रमा २०० भायल र दमकस्थित रेडक्रसमा २०० भायल पठाइएको छ ।
सोहीअनुरुप इटहरी, राजविराज, इनरुवा र सिरहा अस्पतालमा पनि पठाएको स्टोरले जनाएको छ । रासस