प्रेमराज स्मृति चेसको उपाधि रुपेश जैसवाललाई 

कपन अनलाइन

काठमाण्डौ ,बैशाख २१।

ताप्लेजुङ जिल्ला बुद्धिचाल संघका कार्य समिति सदस्य तथा खेलाडी प्रेमराज लिम्बुको स्मृतिमा एकदिने ब्लिज बुद्धिचाल प्रतियोगिता सोमबार सम्पन्न भएको छ ।

कोरोना संक्रमणको कारणले दुखद निधन भएका लिम्बुको स्मृतिमा भएको प्रतियोगिताको उपाधि नेपालका उच्च वरियताका खेलाडी रुपेश जैसवालले जितेका छन्। उनले नवौं चरणको खेलमा काठमाडौका पुरुषोत्तम सिलवाललाई पराजित गरि पूर्ण ९ अंक सहित उपाधि हात पारेका हुन्।

त्यस्तै भोजपुरका सुमन राईले समान ७ अंक नै जोडेका धनुषाका सुशील चौधरीलाई प्रोग्रेसिभ अंकको आधारमा पछि पार्दै दोस्रो स्थानमा रहे। उनले अन्तिम चरणको खेलमा सुदिप तामाङलाई हराउन सफल भए भने शुसिलले मकवानपुरका कृष्ण थापा माथि सफलता हात पारि तेस्रो स्थानमा रहन सफल भए।

ललितपुर स्पोर्ट्स क्लबको आयोजनामा संचालन भएको प्रतियोगितामा  सुदिप तामाङ चौथो , सुशुरत दाहाल पाँचौ भए भने छैटौं देखि आठौंमा पुरुषोत्तम सिलवाल, सुनसरीका तिर्थ सुब्बा र कृष्ण थपा रहे। १०६ खेलाडीहरुको प्रतियोगिताको लागि प्रथम देखि दशौं स्थान हात पार्ने खेलाडीहरुलाई नेपाल बुद्धिचाल संघका सदस्य पुरुषोत्तम थापा र कोरियामा रहनु भएका चेस खेलाडी उत्तमराज थापाले नगद पुरस्कारको प्रायोजन गरेका थिए।