आफ्नो जन्मभूमि ओखलढुंगा बाट वृद्धाभत्ता मासिक पाँच हजार पुर्याउने उपप्रधानमन्त्री पोखरेलको उद्घोष

कपन अनलाइन

ओखलढुंगा ,फागुन १।

आफ्नो जन्मभूमि ओखलढुंगामा पुगेका  उपप्रधानमन्त्री ईश्वर पोखरेलले वृद्धाभत्ता मासिक  पाँच हजार पुर्याउने सरकारको लक्ष्य रहेको बताएका छन। चिशङ्खुगढीमा नेपाल कम्युनिष्ट पार्टी (नेकपा) को जनसभालाई सम्बोधन गर्दै उहाँले सरकारले अघिल्लो निर्वाचनमा वाचा गरेअनुसार वृद्धाभत्ता मासिक रु पाँच हजार दिने बताएका हुन्  ।

गत आर्थिक वर्षबाटै सामाजिक सुरक्षा भत्तामा बढावा दिने तयारी गरिए पनि पार्टीभित्रको एउटा समूहले विरोध जनाएका कारण त्यो सम्भव नभएकोले आगामी दिनमा सरकारले लक्ष्यअनुसार काम गर्ने उल्लेख गर्दै  उपप्रधानमन्त्री पोखरेलले काम गर्न नदिएर सरकारलाई असफल बनाउने र मुलुकलाई पछाडि धकेल्ने प्रयास गरेकाले ताजा जनादेशमा जानु परेको बताएका थिए  ।

उनले अघिल्लो निर्वाचनमा प्रधानमन्त्री ओलीको हस्ताक्षरबाट उम्मेदवारी सिफारिस भएको स्मरण गर्दै विगतदेखि नै पार्टीको नेतृत्व ओलीले गरेकाले अहिले पनि ओली नेतृत्वको नेकपा नै आधिकारिक हुने बताउदै  सूर्य चिह्न पनि ओली नेतृत्वको नेकपाकै हुने उहाँले जिकिर गरेका थिए   ।