कोरोना संक्रमित युवती चढेको विमानबाट आएका ओखलढुंगाका दुई युवाको पहिचान

कपन अनलाइन

ओखलढुंगा ,चैत १३।

गत चैत ४ गते कतारबाट क्यूआर६५२ नम्बरको जहाजबाट नेपाल आएका ओखलढुंगा ठेगाना भएका दुई युवाको पहिचान भएको छ । सोही विमानमा चढेकी एक १९ वर्षीय युवतीमा कोरोना भाइरसको संक्रमण देखिएपछि ओखलढुंगा ठेगाना उल्लेख गरिएका युवाहरुको खोजी भएको थियो ।

सुनुवार थरका ती युवाहरुको  पहिचान भएको खिजिदेम्बा गाउँपालिकाका अध्यक्ष वेदबहादुर रोकाले फेसबुकमा जानकारी दिएका छन्  । ‘यहाँ आएका दुवै युवाहरु भद्र र सुझबुझप्राप्त व्यक्ति हुनुहुन्छ,’ उनले फेसबुकमा स्टाटस लेखेका छन्, ‘उहाँहरुले भर्खर मात्र थाहा पाउनु भएको रहेछ आफ्नो नाम सार्वजनिक भएको । अब तत्काल स्वास्थ्य परीक्षणमा गइहाल्नेमा हुनुहुन्छ रे ।’

संक्रमित युवती चढेकै  जहाजमा आएका दुवै युवाहरूले संयुक्त फेसबुक स्टाटस लेखेर होम क्वारेन्टाइनमा रहेको जनाएका छन् । ‘अहिले  हामी  घर बाहिर निस्केका छैनौँ र निस्किने अवस्था पनि छैन,’ ती युवाहरुले लेखेका छन्, ‘अहिलेसम्म हामीलाई कुनै लक्षण देखिएको छैन ।’