नयाँ वर्षको हार्दिक मंगलमय शुभकामनासहित……….
नयाँ वर्ष २०७० को आगमनमा कपन अनलाइन आफ्ना समस्त पाठक वर्गमा हार्दिक मंगलमय शुभकामना व्यक्त गर्दछ ।
अनलाइन पत्रिका पछिल्ला समयमा विकसित पत्रकारिताको उच्चतम नमूना हो । यसै परिधिभित्र १ वर्षदेखि हामी समाचारहरूलाई सम्प्रेषित गरिरहेका छौँ । यद्यपि आमरुपमा सञ्चालित अन्य अनलाइन पत्रिकाभन्दा हामी अलि पृथक बाटोमा छौं । हाम्रो बाटोमा कपन नाम र यसले ओगट्ने सम्पूर्ण सामाजिक, आर्थिक, राजनैतिक एवम् भौतिक अवयवलाई सबैभन्दा बढि प्राथमिकता दिइन्छ । कपन वा कपन क्षेत्रको विकासमा यो अनलाइन पत्रिका बढि केन्द्रित रहन्छ । यसको अर्थ हामी नितान्त कपनमामात्र केन्द्रित हुने भन्ने चाहिँ होइन । देश विदेशका महत्वपूर्ण पक्षहरुसँग पनि हामी सँधै सचेत भएर समाचार पस्कने छौं ।
समाचार पस्कने क्रममा केही महत्वपूर्ण नीति नियम हामीले तयार गरेका छौंः
- कपन अनलाइन समाचार लेख्दा वा विश्लेषण गर्दा जे भन्न खोजिएको हो शब्द र वाक्यले त्यहि बुझाउनु पर्छ भन्ने मान्यता राख्दछ ।
- कपन अनलाइन आफ्ना कुराहरु अरुको मुखमा कोच्याउन वा आरोपलाई सत्यझैं प्रस्तुत गर्ने खालको समाचार प्रकाशित नगर्नेतिर सचेत छ ।
- कपन अनलाइन समाचारमा भनाइलाई बोझिलो पार्ने गरि वाक्यलाई नचाहिने शब्दको भारी बोकाउने प्रवृतितिर सचेत रहनेछ ।
- कपन अनलाइन पत्रकारिताको भाषामा नचाहिँदो साहित्यिक लेप लगाउने छैन ।
- कपन अनलाइन समाचारमा प्रयोग हुने शब्द, पदावली, आदर तथा तुलना जस्ता महत्वपूर्ण विषयमा सन्तुलन राख्नेछ ।
- अनलाइन पत्रिकामा नेपाली भाषा युनिकोडबाट लेख्नु पर्दा केही भाषा तथा व्यकरणात्मक त्रुटि देखिनु स्वभाविक भए पनि हामी चलनचल्तिको नेपाली व्याकरण र भाषाप्रति अत्यन्त आदर गर्दै सचेत भएर सुद्ध लेखनमा ध्यान दिनेछौं
-केशव पाठक
तपाइँको प्रतिक्रिया ।
