आंशिक प्राध्यायकद्वारा मासिक ज्यालादारीमा नियुक्त गर्न माग

कपन अनलाइन 

काठमाडौँ, २ जेठ । त्रिभुवन विश्वविद्यालयमा कार्यरत नेपाल आंशिक प्राध्यापक सङ्घले सङ्घ आबद्ध प्राध्यापकलाई मासिक ज्यालादारीमा नियुक्त गर्न माग गरेको छ ।

यहाँ आज पत्रकार सम्मेलन गर्दै उनीहरुले दैनिक ज्यालादारीमा काम गर्दा आफूहरु लाई जीवनयापनमा समस्या भएको जनाएका छन् । सङ्घका अध्यक्ष शशिकुमार शर्माले स्थायी र करार कर्मचारी जत्तिकै आफूहरुले पढाए पनि तलबमा विभेद गरिएको आरोप लगाउनुभयो ।

“हामीले स्थायी र करार प्राध्यापक जत्तिकै त्रिविमा सेवा दिएका छौँ”, उहाँले भन्नुभयो, ‘‘हामीलाई त्रिविले कक्षामा पढाएको पिरियडको मात्र तलब दिएको छ । त्यसले हामीलाई जीवनयापन गर्न समस्या हुन्छ । त्यसैले मासिक ज्यालामा नियुक्त गर्नुपर्छ ।’’

सङ्घका महासचिव नरेन्द्रप्रसाद भण्डारीले मासिक ज्यालादारीको माग गर्दै बिहीबारदेखि आन्दोलन गरिने बताउनुभयो ।

रत्नराज्य क्याम्पसका आंशिक प्राध्यापक घमराज लुइँटेलले एउटै विषय पढाउने एउटा प्राध्यापकको एउटा र अर्को प्राध्यापकको अर्को तलब हुनु विभेद हो भन्दै एउटै समयमा पढाउनेको समान ज्याला हुनुपर्ने बताउनुभयो ।

त्रिविले आंशिक प्राध्यापकलाई प्रति पिरियड रु २२० दिने गरेको छ । त्यसमा पनि १५ प्रतिशत कर काट्ने गरिएको छ । त्रिविमा देशभरिका एक हजार ४२० आंशिक प्राध्यापक छन् । रासस