स्थानीय तहको निर्वाचनमा जुट्न मन्त्रीको कर्मचारीलाई निर्देशन

मन्त्रालयका सचिव, सहसचिव र विभागीय प्रमुखलाई आज कार्यकक्षमा बोलाएर उनले निर्वाचित भएर आउने जनप्रतिनिधिको क्षमता विकास गर्न आवश्यक तालिम र अभिमुखीकरणको तयारी गर्न निर्देशन दिए ।

मन्त्री पाण्डेले स्थानीय तह पुनःसंरचना आयोगको प्रतिवेदन कार्यान्वयन भएसँगै क्रियाशील हुने नगरपालिका, गाउँपालिका तथा वडा कार्यालयको भवन निर्माणमा एकरुपता आउने गरी मापदण्ड बनाएर अघि बढ्नुपर्ने बताउनुभयो । नगरपालिका र गाउँपालिकाका केन्द्र र वडाको केन्द्रमा रहनुपर्ने अत्यावश्यक न्यूनतम् पूर्वाधार विकासका लागि स्पष्ट नीति बनाई सोअनुसार बजेटको व्यवस्थापन गर्न जोड दिए ।

मन्त्रीले भने, “नगरपालिका, गाउँपालिका र वडा कार्यालयलाई व्यवस्थित गर्न अहिलेदेखि नै पूर्वाधारको व्यवस्थापन गर्नुपर्छ, दुई महिनाभित्रै कार्यालय भवन बनाइसक्ने गरी काम गर्नुहोस् ।” मन्त्री पाण्डेले कार्यालय भवन बनाउँदा स्थानीयस्तरमा उपलब्ध सामग्रीको समूचित प्रयोग गर्न पनि निर्देशन दिए ।