नेपाल पत्रकार महासंघ झापा शाखाको आयोजना व्यवसायिक पत्रकारितामा सुरु

बिर्तामोड, पुस १७।  नेपाल पत्रकार महासंघ झापा शाखाको आयोजना र बिर्तामोड नगरपालिकाको सहयोगमा ‘व्यवसायिक पत्रकारितामा सामाजिक समावेशीकरण’ विषयक एड्भान्स तालिम आइतवार बिर्तामोडस्थित होटल डेनियलमा शुरु भएको छ ।

नेपाल पत्रकार महासंघका महासचिव उजिर मगरले प्रमुख अतिथिको रुपमा तालिमको उद्घाटन गरे । समारोहलाई सम्बोधन गर्दै महासचिव मगरले पत्रकारहरुले जिम्मेवारपूर्ण ढंगले प्रस्तुत हुनुपर्ने बताए । उनले समावेशी पत्रकारितामा जोड दिँदै श्रमजीवी पत्रकारको न्यूनतम् पारिश्रमिकको ग्यारेन्टी हुनुपर्ने समेत बताए ।

उनले पत्रकार महासंघ, पत्रकारको व्यवसायिक हितका साथै क्षमता अभिबृद्धिमा क्रियाशील रहेको समेत बताए । शाखा अध्यक्ष भीम नेम्वाङको अध्यक्षतामा भएको तालिम उद्घाटन समारोहका वक्ताहरुले अबको पत्रकारिता सामाजिक न्याय र समावेशी हुनुपर्नेमा जोड दिए । तीन दिने प्रशिक्षणको सहजीकरण बरिष्ठ प्रशिक्षक टंक उप्रेतीले गरिरहेका छन् ।

तालिममा झापाका क्रियाशील ५० जना सञ्चारकर्मीको सहभागिता रहेको पत्रकार महासंघ झापाका सचिव एकराज गिरीले जानकारी दिए । सहभागीहरु महिला, दलित, जनजाति, आदिवासी, मधेशी एवम् पछाडि पारिएको वर्गका तथा सम्पादक र व्यवस्थापकहरु समेत रहेका छन् ।

तालिम उद्घाटन समारोहमा महासंघ केन्द्रीय सदस्य गणेश पोखरेल, झापा शाखाका पूर्वअध्यक्ष गोविन्दचन्द्र क्षेत्री, प्रेम युनियनका अध्यक्ष कृष्ण हुमागाई, प्रेस चौतारीका अध्यक्ष मुक्ति पौडेल, प्रेस सेन्टरका अध्यक्ष टीकाराम उप्रेती, मिडिया नेपालका केन्द्रीय उपाध्यक्ष इन्द्रसिंह राजवंशी, फोनिजका अध्यक्ष गणेशमान मुखिया, नारी सञ्चार गृहकी अध्यक्ष सावित्रा दाहाल लगायतले शुभकामना मन्तव्य राखेका थिए ।

महासंघका उपाध्यक्ष तारामणि सापकोटाले स्वागत गरेको कार्यक्रमको सञ्चालन सचिव एकराज गिरीले गरेका थिए । तालिममा पत्रकारिता र पत्रकारको जिम्मेवारीका साथै सामाजिक समावेशीकरणको आवश्यकता तथा त्यसका विविध पक्ष बारे सहभागीलाई सैद्धान्तिक र व्यवहारिक ज्ञानसीप प्रदान गरिने बताइएको छ ।

तपाइँको प्रतिक्रिया ।