PABSON–GHF Model United Nations सम्मेलन भव्य रूपमा शुभारम्भ

कपन अनलाइन

काठमाण्डौ,असार २०।

निजी तथा आवासीय विद्यालयहरूको संगठन नेपाल (PABSON) को आयोजनामा तथा Global Help Foundation (GHF) को सहकार्यमा आयोजित PABSON–GHF Model United Nations (MUN) Conference को भव्य उद्घाटन समारोह हिजो काठमाडौंमा सम्पन्न भएको छ। विद्यार्थीहरूमा नेतृत्व क्षमता, कूटनीतिक सोच, सार्वजनिक वक्तृत्वकला, आलोचनात्मक चिन्तन, वार्ता तथा अन्तर्राष्ट्रिय सम्बन्धसम्बन्धी ज्ञान अभिवृद्धि गर्ने उद्देश्यले सम्मेलन आयोजना गरिएको हो। विभिन्न विद्यालयबाट सहभागी विद्यार्थी तथा प्रतिनिधिहरूले संयुक्त राष्ट्रसंघको कार्यप्रणालीको अभ्यास गर्दै विश्वव्यापी समसामयिक विषयमा छलफल तथा बहस गरिरहेका छन्।

उद्घाटन समारोहमा कार्यक्रमका प्रमुख अतिथि श्री मिठाराम मढिकारी, PABSON केन्द्रीय समितिका अध्यक्ष  कृष्णप्रसाद अधिकारी, श्रीमती सुनिता अधिकारी, सह–अध्यक्ष  गोपालप्रसाद आचार्य लगायत PABSON का पदाधिकारी तथा प्रतिनिधिहरू, Global Help Foundation का बोर्ड सदस्यहरू, विभिन्न विद्यालयका प्रधानाध्यापक, शिक्षक तथा विद्यालय प्रतिनिधिहरू, आयोजक तथा कार्यकारी समितिका सदस्यहरू र सहभागी विद्यार्थीहरूको उल्लेखनीय उपस्थिति रहेको थियो।

कार्यक्रममा वक्ताहरूले विद्यार्थीको शैक्षिक विकास केवल कक्षाकोठामा सीमित नरहने भन्दै उनीहरूलाई व्यवहारिक ज्ञान, नेतृत्व, संवाद, अनुसन्धान र निर्णय क्षमता विकास गर्ने अवसर प्रदान गर्नुपर्नेमा जोड दिएका थिए। MUN जस्ता कार्यक्रमले विद्यार्थीहरूलाई विश्वका विभिन्न दृष्टिकोण बुझ्न, आफ्ना विचार प्रभावकारी रूपमा प्रस्तुत गर्न तथा मतभिन्नतालाई संवाद र सहकार्यबाट समाधान गर्न महत्वपूर्ण भूमिका खेल्ने उनीहरूको भनाइ थियो।

सम्मेलनमा सहभागी विद्यार्थीहरूले विभिन्न देशका प्रतिनिधिका रूपमा भूमिका निर्वाह गर्दै अन्तर्राष्ट्रिय शान्ति तथा सुरक्षा, मानव अधिकार, दिगो विकास, विश्वव्यापी चुनौती तथा अन्य समसामयिक अन्तर्राष्ट्रिय विषयहरूमा छलफल गरिरहेका छन्। MUN का विभिन्न समितिहरूमा सहभागी प्रतिनिधिहरूले debate, moderated caucus, negotiation तथा resolution drafting जस्ता प्रक्रियामार्फत संयुक्त राष्ट्रसंघको वास्तविक कार्यशैलीको अभ्यास गरिरहेका छन्। यसबाट विद्यार्थीहरूमा अनुसन्धान, नेतृत्व, सार्वजनिक वक्तृत्व, टोलीगत कार्य, वार्ता तथा कूटनीतिक क्षमता विकास हुने आयोजकहरूको विश्वास छ। PABSON र Global Help Foundation बीचको सहकार्यमा आयोजित यस सम्मेलनले विद्यार्थीलाई अन्तर्राष्ट्रिय स्तरको सोच विकास गर्न र भविष्यका जिम्मेवार नागरिक तथा नेतृत्वकर्ताका रूपमा तयार पार्न महत्वपूर्ण योगदान पुर्‍याउने आयोजकहरूले बताएका छन्। आयोजकका अनुसार सम्मेलनको मुख्य उद्देश्य विद्यार्थीहरूलाई उत्कृष्ट वक्ता वा बहसकर्ता मात्र नभई जिम्मेवार, सचेत र विश्वव्यापी सोच भएका नागरिकका रूपमा विकास गर्नु हो।

विविध विचार र संस्कृतिको सम्मान गर्दै संवाद, सहकार्य र शान्तिपूर्ण समाधानको संस्कार विकास गर्नु सम्मेलनको अर्को महत्वपूर्ण पक्ष रहेको छ। सम्मेलनमा सहभागी विद्यार्थीहरूले उत्साहपूर्वक विभिन्न समितिका गतिविधिमा सहभागिता जनाइरहेका छन्।

उत्कृष्ट कूटनीतिक प्रस्तुति, नेतृत्व, अनुसन्धान, वार्ता तथा सहभागिताका आधारमा उत्कृष्ट प्रतिनिधिहरूलाई विभिन्न विधामा सम्मान तथा पुरस्कार प्रदान गरिने आयोजकले जनाएको छ। कार्यक्रमलाई सफल बनाउन योगदान पुर्‍याउने सम्पूर्ण सहभागी विद्यालय, प्रधानाध्यापक, शिक्षक, विद्यार्थी प्रतिनिधि, अतिथि, स्वयंसेवक तथा आयोजक र कार्यकारी समितिका सदस्यहरूप्रति आयोजकले आभार व्यक्त गरेको छ। PABSON–GHF MUN ले विद्यार्थीहरूलाई विश्वका चुनौतीहरू बुझ्ने, फरक विचारलाई सम्मान गर्ने र संवाद तथा सहकार्यबाट समाधान खोज्ने संस्कार विकास गर्दै भविष्यका सक्षम, आत्मविश्वासी र जिम्मेवार नेतृत्व निर्माण गर्ने उद्देश्य बोकेको छ।