नेकपा एमाले काठमाण्डौको युवा महोत्सव तयारी पूरा ……

कपन अनलाइन

काठमाण्डौ ,माघ २०।

नेकपा एमाले काठमाण्डौ जिल्ला कमिटीले युवा महोत्सवको तयारी सकिएको छ। आज  सैनिक मंच संगै टुँडिखेलमा बिहान १० बजे शुरू हुने सो महोत्सवको उद्घाटन नेकपा एमालेका अध्यक्ष केपी शर्मा ओलीले गर्ने आयोजकले जानकारी दिएको छ।

बिहीबार काठमाडौंमा पत्रकार सम्मेलन गर्दै देशव्यापी रूपमा गर्न लागिएको युवा महोत्सव अभियान काठमाडौंमा माघ २० गतेबाट शुभारम्भ गरिने काठमाडौं जिल्ला कमिटी अध्यक्ष दीपक निरौलाले जानकारी दिएका छन।

उनले भने,‘अब युवा पुस्ताकै समीपमा रहेर समस्याको पहिचान गर्ने र समाधानका उपायको खोजी गर्ने अनि ‘समाज परिवर्तनका लागि नेतृत्वमा युवा शक्ति’ भन्ने भावना जागृत गराउन अभियान अगाडि बढाएका हौँ । देशव्यापी आयोजना गरिने अभियान हामीले काठमाडौंमा थालनी स्वरूप ‘युवा महोत्सव–२०८०’ एवम सम्मानको आयोजना गर्दै छौँ ।’

उनले कार्यक्रम युवा शक्तिलाई समाज रूपान्तरण दिशामा अभिप्रेरित र जागृत गराउने उद्देश्यको सुरुवाती खुड्किला मात्रै रहेको बताए । कार्यक्रम पश्चात् सुझाव सल्लाहको आधारमा अर्को चरणका महोत्सव समारोहहरूको आयोजना गरिने समेत उनले बताए ।

उनले भने,‘विभिन्न क्रियाकलापहरूको बीचमा आयोजना हुन गइरहेको महोत्सव युवा शक्तिलाई समाज रूपान्तरण दिशामा अभिप्रेरित र जागृत गराउने उद्देश्यको सुरुवाती खुड्किला मात्रै हो । कार्यक्रम पश्चात् प्राप्त सबै प्रकारका सुझाव सल्लाहको आधारमा अर्को चरणमा प्रवेश गर्छौँ ।’