नेपाल फुटबल क्लब संघको अध्यक्षमा कर्माछिरिङ शेर्पा, को को बने पदाधिकारी तथा सदस्य ?
कपन अनलाइन
काठमाण्डौ ,असार २६ ।
अखिल नेपाल फुटबल सङ्घ (एन्फा) का निवर्तमान अध्यक्ष कर्माछिरिङ शेर्पाको अध्यक्षतामा नेपाल फुटबल क्लब संघ गठन गरिएको छ ।
काठमाडौंमा सोमबार भएको ए, बी र सी डिभिजन क्लबका प्रतिनिधिहरूको भेलाले शेर्पाको अध्यक्षतामा नेपाल फुटबल क्लब संघ तदर्थ समिति गठन गरेको हो ।
कार्यसमितिमा ए डिभिजन लिगबाट ६, बी डिभिजनबाट चार र सी डिभिजनबाट तीन जना गरी १३ सदस्य रहेको छ । समितिको उपाध्यक्षमा मनाङ मर्स्याङ्दी क्लबका अध्यक्ष विजय घले र आरसीटीका कुमार राजभण्डारी रहेका छन ।
यस्तै महासचिवमा मध्यपुर यूथ एसोसिएसनका अध्यक्ष उपेन्द्रमान सिंह, सचिवमा सानेपा क्लबका ध्रुव विक्रम पाण्डे र कोषाध्यक्षमा एसएमएस स्पोर्ट्स साँगाका मनोरथ आचार्य रहनुभएको छ ।
यस्तै सदस्यहरूमा सङ्कटा क्लबका अध्यक्ष इन्द्रमान तुलाधर, फ्रेन्ड्स क्लबका विश्वास विक्रम शाह, सातदोबाटो यूथ क्लबका कपिल राना, एनआरटीका डिकेन सुवाल, नयाँबस्ती युवा क्लबका रामकुमार तामाङ, सरस्वती यूथ क्लबका शिक्षित पराजुली र मनोहरा युनाइटेड क्लबका दीपक ज्ञवाली चयन भएका छन ।
भेलामा सहिद स्मारक ए, बी र सी डिभिजन लिग खेल्ने ४२ मध्ये ३२ क्लबका प्रतिनिधिको सहभागिता रहेको थियो ।
