दुधौली -१ को वडा अध्यक्षमा नेकपा एमालेका चन्द्रप्रसाद पहाडी सर्वसम्मत
कपन अनलाइन
काठमाण्डौ ,चैत्र २८ ।
आगामी २०७९ साल बैशाख ३० गते हुने स्थानीय तहको निर्वाचनका लागि सिन्धुलीको दुधौली नगरपालिका वडा नं. १ मा नेकपा एमालेबाट चन्द्रप्रसाद पहाडी सर्वसम्मत उम्मेद्वार चयन भएका छन् ।
शहिद ऋषिराज देवकोटा “आजाद” बाट प्रशिक्षित भएका पहाडी वि.सं. २०३२ सालदेखि कम्युनिष्ट पार्टीप्रति आकर्षित भएका थिए । २०४२ सालमा नेकपा मालेमा आवद्ध भएका पहाडी नेकपा माले र नेकपा एकीकृतको एकतापछि २०४७ साल फागुनमा सम्पन्न नेकपा एमाले हत्पते गाउँपार्टी कमिटीको संस्थापक सदस्य बनेका थिए ।
२०४८ सालको आम निर्वाचनमा नेकपा एमाले उम्मेद्वार गोमा देवकोटाको चुनावी अभियानमा सक्रिय बनेका पहाडी २०४९ सालको स्थानीय निर्वाचनमा नेकपा एमाले हत्पते वडा नं. ८ को वडाध्यक्षको उम्मेद्वार बनेका थिए । त्यसपछि नेकपा एमाले ईलाका कमिटी सदस्य समेत बनेका थिए ।
२०६९ सालमा तिर्थ बरालको नेतृत्वमा बनेको दुधौली १ वडा कमिटीको सदस्य बनेका पहाडी २०७३ सालमा नेकपा एमाले दुधौली १ का अध्यक्ष बने । नेकपा एमाले र नेकपा माओवादी केन्द्रबिचको एकतापछि नेकपा दुधौली १ का पार्टी अध्यक्ष बनेका पहाडी २०७८ कात्तिकमा सम्पन्न नेकपा एमाले दुधौली नगर कमिटीको अधिवेशनबाट नगर कमिटी सचिवालय सदस्य र वडा नं. १ को पार्टी ईञ्चार्जको जिम्मेवारीमा रहेका छन् ।
