प्रहरीमाथि अभद्र व्यवहार गरेको आरोपमा तीनजना पक्राउ

सुनसरीमा प्रहरीमाथि अभद्र व्यवहार गरेको आरोपमा तीनजना पक्राउ परेका छन् ।

शुक्रबार राति बर्जु गाउँपालिका–१, गेलाबारीमा डिउटीमा खटिएका प्रहरीमाथि अभद्र व्यवहार गरेको आरोपमा उनीहरू पक्राउ परेका हुन् ।पक्राउ पर्नेहरूमा बर्जु–६, चिमडी बस्ने ३४ वर्षीय युवराज चौधरी, ३३ वर्षीय सनि चौधरी र १९ वर्षीय मुन्ना भनिने सनि चौधरी छन् ।

प्रहरीका अनुसार उक्त स्थानमा केही मानिस मादकपदार्थ सेवन गरी हो–हल्ला गरिरहेको भन्ने सूचनाको आधारमा प्रहरीचौकी राबे शुक्रबारेबाट खटिएको प्रहरी टोलीले सम्झाइबुझाइ गर्दा उनीहरूले अपशब्द प्रयोग गरेका थिए ।

प्रहरीमाथि हातपातसमेत गरेपछि को४प ५१२५ र को१८प ३९६८ नम्बरको मोटरसाइकलसहित उनीहरूलाई पक्राउ गरिएको प्रहरी प्रधान कार्यालयले जनाएको छ ।