चम्पादेवी गाउँपालिका- ८ को आफ्नै भवनबाट सेवा सुरु

कपन अनलाइन

ओखलढुंगा, चैत १०। ओखलढुंगा चम्पादेवी गाउँपालिकाको वडा नं – ८ को कार्यालयले आफ्नै भवनबाट सेवा दिन थालेको छ ।

यसअघि भाडाको भवनबाट कार्यालय सञ्चालन गर्दै आएको वडा कार्यालयले आफ्नै भवनबाट सेवा दिन थालेको हो । भवन सञ्चालनमा आएपछि ८ नं वडा आफ्नै भवनबाट सेवा दिने चम्पादेवी गाउँपालिकाको पहिलो वडा बनेको छ । भवन गाउँपालिका अध्यक्ष नवराज केसीले उद्घाटन गरेका थिए ।

२ कोठा र एउटा हल भएको २ तले पक्की भवन निर्माण भएपछि वडाका सेवाग्राहीलाई सेवा दिन सहज भएको छ । गाउँपालिका र वडाको १५ लाख रुपैयाँ बजेटबाट भवन निर्माण गरिएको गाउँपालिकाका ८ नं वडाध्यक्ष अजय लुइटेलले जानकारी दिए । गाउँपालिकाका अरु वडा कार्यालयहरु अझैपनि भाडाको भवनबाट सेवा प्रवाह गरिरहेका छन् ।