स्कुल बस दुर्घटना, ४० जना घाइते

कपन अनलाइन 

नवलपरासी, २४ कात्तिक । नवलपरासीको रामग्राम नगरपालिकास्थित सुक्रौलीमा आज एउटा स्कुल बस दुर्घटना हँुदा करिब ४० जना घाइते भएका छन् । चितवनबाट नवलपरासी हुदै लुम्बिनी भ्रमणमा गइरहेको चितवन भरतपुर महानगरपालिका–६ स्थित देवज्योति निम्न माविको ग १ ख ३१८९ नं को विद्यार्थी सवार बस भैरहवा भूमही सडक खण्ड अन्तर्गत नवलपरासीको सुक्रौलीमा दुर्घटना भएको थियो ।

उनीहरु लुम्बिनी पिकनिक खान गइरहेका थिए । बस सडक छेउमै सानो पोखरी जस्तो रहेको खाल्टोमा पल्टिएपछि सो दुर्घटना भएको हो । दुर्घटनामा परी घाइते भएकामध्ये अधिकाँशको स्वास्थ्य अवस्था समान्य रहेकाले उनीहरुलाई जिल्ला पृथ्वीचन्द्र अस्पताल परासीमा सामान्य उपचारपछि घर पठाइएको छ। केही विद्यार्थीलाई थप उपचारका लागि चितवन पठाइएको जिल्ला प्रहरी कार्यालय नवलपरासीले जनाएको छ ।
बसमा कुल ४९ जना सवार थिए । बसको आधाभन्दा बढी भाग पानीमा डुबेपछिभित्र सवार विद्यार्थी तथा शिक्षकलाई स्थानीय र प्रहरीको सहयोगले उद्धार गरिएको छ । दुर्घटनाका कारण यकिन हुनसकेको छैन ।