सलमानले भनेः मेरो कारणले भाईहरु पछि परे
कपन अनलाइन
मुम्बई । भारतीय संचार मिडियामा प्रकाशित समाचार अनुसार बलिउड अभिनेता सलमान खान आफ्ना दुई भाईहरुलाई खुब माया गर्छन् । उनका दुवै भाई अरवाज र सोहेल खान पनि फिल्म इन्डष्ट्रीमै छन् ।हालै बीबीसीसँगको एक अन्तरवार्तामा सलमानले भाईहरुको करिअरप्रति चिन्ता व्यक्त गरे । उनले आफ्नो कारणले भाई माथि उठ्न नसकेको बताए ।
‘जब उनीहरु फिल्ममा आए, म अर्को लेभलमा पुगिसकेको थिएँ,’ सलमानले भने, ‘त्यतिबेला निर्माता-निर्देशकहरु मेरा भाईहरुलाई जस्तोतस्तो रोल दिँदा म रिसाउँछु कि भन्ने ठान्थे । त्यसैले उनीहरुले पर्याप्त मात्रामा फिल्म नै पाएनन् । आफूलाई ग्रुम गर्नै सकेनन् ।’
यद्यपि भाईहरु अभिनयमा पछि परे पनि फिल्म प्रोड्युसरका रुपमा राम्रो गरिरहेको भन्दै सलमानले सन्तोष व्यक्त गरे । उनको आगामी फिल्म ‘ट्युवलाइट’ मा सोहेलले पनि अभिनय गरेका छन् ।
सोही अन्तरवार्तामा सलमानलाई सोधिएको थियो कि तपाईंको ट्यूवलाइटले बाहुबली २ को रेकर्ड तोड्न सक्ला कि नसक्ला ?
यसको जवाफमा सलमानले भने, ‘बाहुबली २ र दंगलले बनाएको रेकर्ड तोड्न अब धेरै समय लाग्छ । तर, कथंकदाचित मेरो फिल्मले तोडिहाल्यो भने म आफ्नो भनाई फिर्ता लिनेछु ।’
