दुर्घटनामा एकको मृत्यु, एक घाइते
कपन अनलाइन
लहान, ६ जेठ । पूर्वपश्चिम राजमार्ग अन्तर्गत सिरहाको लहान नगरपालिका– १२ स्थित सडकमा आज नम्बर नखुलेको सवारी साधनको ठक्करबाट मोटरसाइकलमा सवार एक जनाको मृत्यु भएको छ भने अर्का एक घाइते भएका छन् ।
अज्ञात सवारी साधनले स ६ प ६१७ नम्बरको मोटरसाइकललाई ठक्कर दिँदा मोटरसाइकल पछाडी सवार कैलाली टिकापुर बस्ने निरज कुसमीको मृत्यु भएको इलाका प्रहरी कार्यालय लहानले जनाएको छ ।
सो दुर्घटनामा परी मोटरसाइकल चालक सिरहाको धनगढीमाई नगरपालिका– १ निवासी ३२ वर्षिय सन्तोष चौधरी गम्भीर घाइते भएका छन् । घाइते चौधरीलाई उपचारको लागि विराटनगरस्थित न्यूरो अस्पताल पठाएको इलाका प्रहरी कर्यालय लहानले जानएको छ ।
अवैध काठसहित ट्र्याक्टर पक्राउ
त्यसैगरी प्रहरीले सिरहाको गोलबजार नगरपालिका–४ स्थित सडकबाट आज बिहान अवैध काठसहित ट्र्याक्टर नियन्त्रणमा लिएको छ ।
इलाका प्ररही कार्यालय गोलबजारबाट खटिएको प्रहरीको टोलीले पूर्व –पश्चिम राजमार्गमा चेकजाँच गर्ने क्रममा अवैध काठसहित स १ त १७१२ नम्बरको ट्याक्टर नियन्त्रणमा लिएको हो । पक्राउ परेका ट्र्याक्टरबाट मसलारभिस जातको विभिन्न नापका करिब ४० किबी गोलिया काठ तथा दाउरा बरामद भएको इलाका प्रहरी कार्यालय गोलबजारले जनाएको छ । रासस
