तीन किमी सडक नखोल्दा १२ किमी हिँड्न बाध्य छन् लुमवासी

कपन अनलाइन 

जुम्ला, ३० फागुन । वर्षांैदेखि सिंजा कनकासुन्दरी–१ लुमगाउँका स्थानीयवासी तीन किलोमिटर सडक नखोल्दा १२ किलोमिटर हिँड्दै आएका छन् ।

विगत पाँच वर्षदेखि तीन किलोमिटर सडक खोल्न गुहार माग्दै लुमवासी जिल्ला विकास समिति र यहाँका दलसँग पटकपटक धाए, तथापि सडक खोल्ने उनीहरुको प्रयास सफल हुन सकेन । लुम–बाम्नेमाडु जोड्ने दुई हजार ७०० मिटर दुरी मात्र छ, तर त्यही बाम्नेमाडु जान हामीले १२ हजार मिटर हिँड्नु पर्छ, स्थानीय रामबल बुढाले दुखेसो गर्नुभयो । अहिले लुम–बिगारे–फुटासिली–बुडुगाउँ हुँदै बाम्नेमाडु जान बाध्य भएको बूढाले बताउनुभयो ।

“लुमगाउँ मुगु नजिक भएकाले मुगुका सांसद् मोहन बानियाँलाई बाटो खोल्दिन गुहार मागे, तर त्यसमा विराट गाविस बुडुगाउँका जनताले अवरोध गर्दा उपाय लागेन,” उहाँले भन्नुभयो । यो वर्ष मात्रै जिविस जुम्लामा १६ पटक धाएको उहाँको भनाइ थियो ।

लुमगाउँकै स्थानीय भीमबहादुर बूढाले लुमवासी वर्षौंदेखि सडक, विद्युत्, सञ्चार, स्वास्थ्यको सहज पहुँचमा नरहेको बताउनुभयो । जनक बूढाले सिंजा भेकमा अवस्थित ११ गाविसमध्येको धार्मिक र ऐतिहासिक महत्व बोकेको कनकासुन्दरी लुमगाउँका ८५ घरधुरीका ८०० घरपरिवारले विकासको वास्तविक स्वाद चाख्न नभएको गुनासो गर्नुभयो । उहाँले कनकासुन्दरी माईको मन्दिर संरक्षणमा राज्यले बेवास्ता गर्दा यसको इतिहास मेटिदै गएको विचार व्यक्त गर्नुभयो ।

स्थानीय विकास अधिकारी हरिनारायण बेल्बासेले यो वर्ष जसरी भए पनि लुम–बाम्नेमाडु जोड्ने दुई हजार ७०० मिटर बाटो खोलेर सो गाउँका समुदायको न्याय गर्ने बताउनुभयो ।

यसअघि पनि जिविसले सो बाटोको निम्ति केही बजेट छुट्याए पनि काम अपुरो भएकाले त्यसलाई यस वर्ष पूर्णता दिने स्थानीय विकास अधिकारी बेल्बासेको भनाइ छ । रासस