हिमालयन डुओ चेस आइतबार हुने
कपन अनलाइन
काठमाण्डौ ,फागुन १०।
हिमालयन चेस एकेडेमीले व्यक्तिगत खेलमा पनि टिम भावना बढाउने उद्देष्यले ‘हिमालयन डुओ’ र्यापिड चेस आइतबार आयोजना गर्ने भएको छ ।
एकेडेमीको थापालीस्थित चेस हलमा सञ्चालन हुने प्रतियोगितामा दुई खेलाडी समावेश एक टिममा एक रेटेड र एक अनरेटेड खेलाडी हुनुपर्ने प्रावधान छ । परिवारका सदस्य, नातेदार, साथीभाइ, क्लासमेट, गुरु–चेलाको टिमले प्रतिस्पर्धा गर्ने अवसर पाउनेछन् । स्वीस प्रणालीअुसार ५ राउन्डमा सञ्चालन हुने एकदिने प्रतियोगितामा समय १० मिनेटसँगै १० सेकेन्ड इन्क्रिमेन्ट तोकिएको छ ।
हिमालयन चेस एकेडेमीकी संस्थापक मोनालिशा खम्बू भन्छिन्, ‘जुनसुकै उमेरकाले खेल्नसक्ने चेस व्यक्तिगत खेल हो । तर, मानिसलाई जीवन सहज र राम्रो बनाउनका लागि समूहिक भावना आवश्यक हुन्छ । त्यसैले चेसमा पनि टिम भावना बढाउने उद्देष्यले हिमालयन डुओ आयोजना गर्न लागिएको हो ।’ नेपाल बुद्धिचाल महासंघकी उपमहासचिवसमेत रहेकी उनी नेपालकी पहिलो महिला राष्ट्रिय चेस च्याम्पियन हुन् ।
प्रतियोगिता संयोजक प्रयुक्ता केसी भन्छिन्, ‘फेब्रुअरी इज द मन्थ अफ लभ तर मान्छेहरूले रोमान्टिक पार्टनरलाई मात्रै सेलेब्रेट गर्छ भने हामी परिवार, साथीभाइको लभलाई पनि सेलेब्रेट गर्न हिमालयन डुओ आयोजना गर्दैछौं । उनका अनुसार बढीमा १४ टिमलाई सहभागि गराइनेछ, जसमा आठ टिम दर्ता भइसकेका छन् । टिम दर्ताको लागि अन्तिम दिन शनिबार तोकिएको छ ।
गत वर्ष स्थापित हिमालयन चेस एकेडेमीको पाँचौ प्रतियोगिता हो हिमालयन डुओ । उसले यसअघि एसईई कप, हिमालयन १०० फर गिनिज वल्र्ड रेकर्ड्स, हिमालयन तीज चेस टोर्नी र प्यट्रिओटिक पन च्याम्पियनसिप सफलतापूर्वक आयोजना गरिसकेको छ । एकेडेमीले १ सय बढीलाई चेसको नियमित ट्रेनिङ दिनुकासाथ स्कुल र समुदायमा कार्याशाला तथा प्रशिक्षण सञ्चालन गर्दै आएको छ ।