तुल्सिलाल स्मृति बुद्धिचाल सोमबारदेखि हुने

कपन अनलाइन
काठमाडौं , पुस २३।
नेपाल कम्युनिस्ट पार्टीका तत्कालीन महासचिव स्वर्गीय तुल्सिलाल अमात्यको स्मृतिमा ललितपुर स्पोर्ट्स क्लब र नेपाल बुद्धिचाल महासंघको संयुक्त आयोजना रहेको छैटौं तुल्सिलाल स्मृति राष्ट्रिय क्लब टिम च्याम्पियनसिप बुद्धिचाल प्रतियोगिता यहि पुस २३ देखि २८ गतेसम्म हुने भएकोछ।
ललितपुरको च्यासल स्थित तुल्सिलाल प्रतिष्ठान हलमा लिग कम नकआउट आधारमा हुने प्रतियोगिताको विजेता टिमले नगद पुरस्कार २ लाख , उपविजेताले १ लाख २० हजार , तेस्रो स्थान प्राप्त गर्ने टिमले ६० हजार र चौथो हुने टिमलाई ४० हजार नगद पुरस्कार प्रदान गरिनेछ। त्यसैगरी प्रत्येक बोर्डमा प्रथम हुने ४ जना खेलाडीहरुलाई जनही १०/१० हजार पुरस्कारको व्यवस्था गरिएकोछ। जस अनुसार कूल पुरस्कार राशी ४ लाख ७० हजार प्रदान गरिने प्रतियोगिताका संयोजक राजु ताम्राकारले जानकारी गराएका छन्।
विगत भन्दा फरक शैलीमा खेलाइने प्रतियोगिताका प्रत्येक टिममा वैकल्पिक सहित ५ जना खेलाडीहरुको सहभागीता रहनेछ। जस अनुसार प्रतियोगिता संरचनामा खेलाडीहरुलाई A, B, C र D गरि चार समूह वर्गीकरण गरिएको छ। जस अनुसार समूह ए मा टाइटल प्राप्त खेलाडी, पूर्व नेपाल च्याम्पियन, राष्ट्रिय प्रतियोगितामा उत्कृष्ट दश स्थान प्राप्त खेलाडी तथा १९०० रेटिङ माथिका खेलाडी रहने छन्। समूह बि मा १९०० रेटिङ मुनिका खेलाडीहरु, समूह सि मा यु २० र मूह डि मा यु १६ वा महिला खेलाडी रहने छन् । वैकल्पिक खेलाडीमा जुन समुहको खेलाडी हो त्यही ठाउँमा प्रतिस्पर्धा गर्न पाउने छन।
प्रतियोगितामा डिफेन्डिङ च्याम्पियन थापाथली चेस पार्क क्लब , ललितपुर स्पोर्ट्स क्लब , , गोल्डेन गेट क्लब , लुम्बिनी इभेन्ट मेनेज्मेन्ट टिम, सुदुर पश्चिम खेलकुद विकास परिषद , दोलखा चेस होम, दोलखा बुद्धिचाल संघ, गण्डकी प्रदेश बुद्धिचाल संघ, कास्की जिल्ला बुद्धिचाल संघ, ललितपुर महानगरपालिका , गोदावरी नगरपालिका , पुल्चोक क्याम्पस , ललितपुर जिल्ला बुद्धिचाल संघ गरि बीस वटा टिमहरुको सहभागीता रहने छन्।
सोमबार प्रतियोगिताको उदघाटन राष्ट्रिय खेलकुद परिषदका सदस्य सचिव टंकलाल घिसिङले गर्नु हुनेछ भने पुरस्कार वितरण प्रमुख प्रतिपक्ष दलका नेता तथा पूर्व प्रधानमन्त्री केपी ओली शर्माले गर्नेछ।