शंखरापुर नगरपालिका र मनास्लु वर्ल्ड कलेजबिच सहकार्यका लागि “शैक्षिक सम्झौता”
कपन अनलाइन
काठमाण्डौ,मंगसिर ३०।
शंखरापुर नगरपालिका र मनास्लु वर्ल्ड कलेजबिच विभिन्न शैक्षिक कार्यक्रमहरु संचालनार्थ एक सम्झौता भएको छ ।
कार्यक्रममा शंखरापुर नगरपालिका नगर प्रमुख रमेश नापित, प्रमुख प्रशासकीय अधिकृत वासुदेव खनाल, नगर प्रवक्ता राधाकृष्ण श्रेष्ठ, शिक्षा युवा तथा खेलकुद शाखा प्रमुख सुकदेव नेपाल लगायत विभिन्न वडाका वडा अध्यक्षहरुको उपस्थितिमा गरपालिकामा एक कार्यक्रम गरी सम्झौता गरिएको छ।
शंखरापुर नगरपालिकाको तर्फबाट नगर प्रमुख रमेश नापित र मनास्लु वर्ड कलेजको तर्फबाट कलेजका अध्यक्ष गेन्द्र लामाले संयुक्त रुपमा सम्झौतामा हस्ताक्षर गरेका थिए।
सो सम्झौतामा मनास्लु वर्ल्ड कलेजले यस नगरपालिकाका एसईई उत्तीर्ण जेहेन्दार तथा आर्थिक रुपमा विपन्न विद्यार्थीहरुलाई यस नगरपालिकाको विशेष सिफारिसमा वार्षिक १० जना सम्मलाई अध्ययनका लागि छात्रवृत्ति प्रदान गरिनुका साथै स्नातक तहका लागि पनि छात्रवृत्ति प्रदान गरिने उल्लेख गरिएको छ ।
नगरपालिका अन्तरगतका सामुदायिक तथा संस्थागत विद्यालयहरुका शिक्षक शिक्षिका तथा विद्यार्थीहरुलाई क्षमता अभिवृत्ति तथा विभिन्न शैक्षिक उन्नयनका कार्यक्रमहरुमा मनास्लु वर्ल्ड कलेजले विशेष सहोग तथा सहकार्य गर्नेछ।
