अवैध लागूऔषधसहित पाँच जना पक्राउ
कपन अनलाइन
काठमाडौं, जेठ ४ ।
निजगढ नगरपालिका-८ उनासी पुलस्थित सडकबाट अवैध लागूऔषध गाँजा करिब १३ केजी ५ सय ग्रामसहित ४ जनालाई बुधबार बिहान प्रहरीले पक्राउ गरेको छ । पक्राउ पर्नेहरूमा मकवानपुर मनहरी गाउँपालिका-८ ज्यामिरे बस्ने ३४ वर्षीय राजकुमार भने चन्द्र बहादुर मोक्तान, झापा मेची नगरपालिका-६ शान्तिटोल बस्ने ४६ वर्षीय शंकर दाहाल, सोही नगरपालिका-७ बस्ने ३४ वर्षीय बिनोद कुमार पोखरेल र रौतहट चन्द्रपुर नगरपालिका-८ बस्ने २४ वर्षीय अर्जुन गौतम रहेका छन् । ईलाका प्रहरी कार्यालय निजगढबाट खटिएको प्रहरीले हेटौंडाबाट काँकडभिट्टातर्फ जाँदै गरेको मे.१ ख २३२२ नम्बरको बसलाई जाँच गर्ने क्रममा बसको सिट मुनी स्याउको कार्टुनभित्र लुकाई छिपाई राखेको उक्त परिमाणको गाँजा फेला पारी उनीहरूलाई पक्राउ गरेको हो ।
त्यस्तै उर्लाबारी नगरपालिका-४ बक्राहा पुलको मलामी चौतारी नजिकबाट अवैध लागूऔषध खैरो हेरोईन जस्तो देखिने पदार्थ करिब ४ ग्राम ७ सय ६० मिलिग्रामसहित सोही नगरपालिका-४ आइतबारे बस्ने सन्जय प्रधानलाई मंगलबार दिउँसो प्रहरीले पक्राउ गरेको छ । विशेष सूचनाको आधारमा ईलाका प्रहरी कार्यालय उर्लाबारीबाट खटिएको प्रहरीले मे.५ प ८८२४ नम्बरको मोटरसाइकललाई जाँच गर्ने क्रममा चालक प्रधानलाई उक्त पदार्थसहित फेला पारी पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।
