असार : रिता दाहाल (कविता )

कपन अनलाइन 

काठमाडौं ,असार १७।

धुलो हटाउन पानी बनिकन आउँछ असार

मानो खाई मुरी उब्जाउ भनिकन आउँछ असार

महलमा बसेर मैहुँ भन्नेलाई केथाहा हुन्छ र हजुर

गरिबको वर्ष दिनको खाना बनि आउँछ असार।।

मुखिया र जमदारको सान बनि आउँछ असार

मसिरमा धान बन्न धाम बनि आउँछ असार

चैत बैशाखको खडेरी लाई के थाहा हुन्छ र हजुर

खेती लाउन पानी को मुहान बनि आउँछ असार।।

हलि बाउसे रोपारेको चटारो बनि आउँछ असार

धान रोपाइँ सकाउन हतारो बनि आउँछ असार

गरिबी हटाउँछु भन्नेलाई के थाहा हुन्छ र हजुर

मकै पाके अनिकालको झट्टारो बनि आउँछ असार।।

कोइली ले कुहु गर्न थाकेपछि आउँछ असार

पालुवाले रुखका पात ढाकेपछि आउँछ असार

वनका गिटठा भ्याकुर ला ई के थाहा हुन्छ र

फल फुलको राजा आँप पाकेपछि आउँछ असार।।