मोलुङ गाउँपालिकाद्वारा औद्योगिक ग्राम स्थापना गर्न सरकारसँग सम्झौता

कपन अनलाइन

ओखलढुंगा ,फागुन २३।जिल्लाको मोलुङ गाउँपालिका औद्योगिक ग्राम स्थापनाका लागि सरकारसँग सम्झौता गर्ने प्रदेश नं १ कै पहिलो गाउँपालिका बनेको छ ।

विहीबार उद्योग, वाणिज्य तथा आपूर्ति मन्त्रालयमा आयोजित एक कार्यक्रमका बीच गाउँपालिकाले सरकारसँग सम्झौता गरेको हो ।

औद्योगिक ग्राम निर्माणका लागि सम्झौता कार्यक्रममा उद्योग, वाणिज्य तथा आपूर्ति मन्त्री लेखराज भट्ट, प्रतिनिधिसभा सदस्य यज्ञराज सुनुवार र गाउँपालिका अध्यक्ष मणिराज राई सहभागी थिए । मन्त्रालयमा भएको सम्झौतापश्चात् मन्त्रालयले ९२ लाखको चेक समेत गाउँपालिकालाई हस्तान्तरण गरेको अध्यक्ष राईले बताए ।

औद्योगिक ग्रामका लागि गाउँपालिकाले यसअघि नै जग्गा प्राप्ति सम्बन्धी प्रक्रिया अगाडि बढाएको थियो । जग्गा प्राप्तिको केही प्रक्रिया अझै बाँकी रहेपनि गाउँपालिकाले चाँडै औद्योगिक ग्रामको काम थाल्ने जनाएको छ । औद्योगिक ग्राम मोलुङ गाउँपालिकाको वडा नं ६ मा रहने टुंगो लागेको छ । ‘हामीले औद्योगिक ग्राममा बढी मात्रामा जडीबुटी भण्डारण र प्रशोधनको काम गर्छौँ,’ गाउँपालिका अध्यक्ष राईले भने, ‘यसले समृद्ध मोलुङ बनाउन टेवा पुर्याउँछ भन्ने हामीले अपेक्षा लिएका छौँ ।’

औद्योगिक ग्रामका लागि गाउँपालिकाले विस्तृत परियोजना प्रतिवेदन समेत तयार गरेको छ । प्रतिवेदनमा औद्योगिक ग्राम निर्माणका लागि ५ करोडको हाराहारीमा लागत लाग्ने अनुमान गरिएको छ ।

सरकारले स्थानीय तहमा औद्योगिक ग्राम स्थापना गरेर कुल ग्राहस्थ उत्पादनमा उद्योगको योगदान बढाउने र गाउँगाउँमा औद्योगिक विकास र उद्यमशीलता विकास गर्दै आर्थिक समृद्धि हासिल गर्ने उद्देश्य लिएको छ । सरकारले चालु आर्थिक वर्षमा देशभरिका ३७ वटा स्थानीय तहमा औद्योगिक ग्राम स्थापना गर्दैछ ।