साहित्यिक पत्रकार तथा कवि चेतनाथ धमला प्रेस काउन्सिल सदस्य नियुक्त

कपन अनलाइन, काठमाडौँ, ६ पुस, २०७३

प्रेस काउन्सिल नेपालको रिक्त सदस्यमा साहित्यिक पत्रकार चेतनाथ धमला नियुक्त भएका छन् । बेतिनी–९, ओखलढुङ्गामा विसं २०२७ साउन १९ मा जन्मनुभएका धमला ‘कौशिकी’ साहित्यिक पत्रिकाका प्रकाशक तथा सम्पादक हुन् । सूचना तथा सञ्चारमन्त्रीस्तरको यही पुस ४ गतेको निर्णयअनुसार प्रेस काउन्सिल ऐन, २०४८ को दफा ६ (१) बमोजिम चार वर्षका लागि उहाँलाई मनोनयन गरिएको हो ।

विसं २०५२ देखि पत्रकारितामा आबद्ध धमला हाइकू, ताङ्का, कविता, गीत, गजल, चोका, समीक्षा र सम्पादन विधामा सक्रिय छन् । नेपाल साहित्यिक पत्रकार सङ्घका उपमहासचिव रहनुभएका उनले नेपाल प्रज्ञा–प्रतिष्ठानको राष्ट्रिय कविता महोत्वस, २०७१ मा द्वितीय पुरस्कार पनि प्राप्त गरेका थिए ।