मौरीपालक किसानलाई समस्या

कपन अनलाइन, कञ्चनपुर, ६ पुस ।

लगानी अनुसारको आम्दानी गर्न नसकिएपछि मौरीपालक किसान मारमा परेका छन् ।

चरनक्षेत्रको अभावका कारण मह न्यून मात्रामा उत्पादन हुन थालेपछि किसान अन्य पेसा अपनाउन बाध्य भएका छन् । पाँच वर्ष अघिदेखि मौरीपालनमा लागेका शङ्करपुर गाविस– ७ का नरेश बोहराले आम्दानी लिन नसकेपछि व्यवसाय नै छाडनुभएको छ ।

दोदा नदीको बाढीले खेतबारी बगाएपछि उहाँले मौरीपालन व्यवसाय अपनाउनुभएको हो । “लगानी अनुरुप मह उत्पादन हुन सकेन्,” उहाँले भन्नुभयो ।

त्यसैगरी सेरेना र मेलिफेरा जातको मौरीपालन गर्दै आएका भीमदत्त नगरपालिकाका हर्कबहादुर थापा लगानी उठ्न नसकेपछि व्यवसाय त्यागेको बताउनुहुन्छ । मौरीपालकलाई तालिम र ज्ञानको अभाव रहेको उहाँको भनाइ छ ।

जिल्लाको बेलौरी, पुर्नवास, भीमदत्त नगरपालिकाका चारवटा ठाउँमा नमुना प्रदर्शन गरी किसानलाई मौरीका घार निःशुल्क वितरण गरिएको वरिष्ठ कृषि विकास अधिकृत यज्ञराज जोशी बताउनुहुन्छ । वार्षिक तीन क्विन्टलदेखि पाँच क्विन्टलसम्म माहुरीको मह उत्पादन हुने गरेको उहाँले बताउनुभयो ।

जियो लाइट जडान गर्न सम्झौता

खानेपानीमा चुनाको समस्या हटाउनका लागि भीमदत्त नगरपालिका– ८ तिलाचौरस्थित महेन्द्रनगर साना सहरी खानेपानी तथा सरसफाइ समितिले जियो लाइट प्रविधि जडानका लागि नगर विकास कोषसँग ऋण सम्झौता गरेको छ ।

समिति र कोषबीच जियो लाइट प्रविधि जडानका लागि रु छ करोड सात लाख ३९ हजारको ऋण सम्झौता भएको छ । समितिका अध्यक्ष अफिलाल जोशीका अनुसार नगर विकास कोषले उपलब्ध गराउने ऋण र अनुदान रकम बाहेक उपभोक्ताले रु चार लाख २९ हजार व्यहोर्नु पर्नेछ । दुई हजार ४०० परिवारले खानेपानीको उपभोग गर्दै आएका छन् । रासस