काठमाण्डौ महानगरपालिकाका कर्मचारीले जनप्रतिनिधिलाई हराए

कपन अनलाइन

काठमाण्डौ ,मङ्सिर २५।

काठमाडौँ महानगरपालिकाले  प्रमुख ११ र प्रमुख प्रशासकीय अधिकृत ११ मैत्रीपूर्ण फुटबल सम्पन्न गरेको छ । सो मैत्रीपूर्ण खेलमा काठमाण्डौ महानगरपालिकाका कर्मचारीहरुले ५-३ गोल अन्तरले जनप्रतिनिधहरुलाई पराजित गरेका छन।

२९ औँ महानगर दिवस २०८० का अवसरमा दशरथ रङ्गशालामा आयोजना गरिएको खेलमा जनप्रतिनिधिको नेतृत्व प्रमुख बालेन्द्र शाह (बालेन) र कर्मचारीको नेतृत्व प्रमुख प्रशासकीय अधिकृत बसन्त अधिकारीले  गरेका थिए । महानगर दिवस  प्रतियोगिता सञ्चालन उपसमितिले खेलको आयोजना गरेको हो।

खेलको शुरुवात गर्दैै राष्ट्रिय खेलकुद परिषदका सदस्य सचिव टंकलाल घिसिङ्ले रेफ्री ओम न्पौपानेलाई र रेफ्री न्यौपानेले महानगरका प्रमुख शाह र उपप्रमुख एवं महानगर दिवस मूल समारोह समितिकी संयोजक सुनिता डंगोललाई फुटबल हस्तान्तरण गरेका थिए।

खेलमा कर्मचारीकातर्फबाट जीवन थापाले ३ गोल र सविन लामाले २ गोल गरेका थिए भने  जनप्रतिनिधिका तर्फबाट प्रेम थापाले १ गोल र नविन भण्डारीले २ गोल गरेका थिए  ।