चन्द्रागिरि नगरपालिका ४ गोदाम चौरमा राँगो आतंक , प्रहरीले गोली हानेर मार्यो

कपन अनलाइन

काठमाण्डौ ,साउन १३।

प्रहरीले चन्द्रागिरि नगरपालिका ४ गोदाम चौरमा राँगोलाई गोली हानेर मारेको छ । राँगोले आतंक मच्चाएपछि प्रहरीले आज बिहान साढे ७ बजेतिर एक राउन्ड गोली हानी राँगो मारेको हो।

थानकोट प्रहरीका अनुसार नेपालगञ्जबाट गाडीमा ल्याइएको उक्त राँगो चन्द्रागिरि ३ खरीबोटमा शुक्रबार बिहान ३ः३० बजे गाडीबाट झार्ने क्रममा भागेपछि खरिबोट-त्रिभुवन पार्क- चेकपोष्ट हुँदै गोदाम पुगेर स्थानीयको कम्पाउण्डमा  पसेको थियो ।

उक्त राँगोलाई नियन्त्रणमा लिन सम्भव नदेखिएपछि प्रहरीले एक राउण्ड गोली हानेको थियो ।गोली प्रहार गरेर राँगो मारिएपछि अवस्था सामान्य रहेको प्रहरीले जनाएको छ। घटनामा मानवीय क्षति भने नभएको प्रहरीले जनाएको छ।

चन्द्रागिरिमा राँगोलाई प्रहरीले गोली हानेर मारेको यो पहिलो घटना भने होइन । यसअघि २०७५ साल फागुन ११ गते चन्द्रागिरि नगरपालिकाको मच्छेगाउँ हुँदै दहचोकसम्म लखेटेर प्रहरीले गोली हानेर सो राँगोलाई मारेको थियो ।