कागेश्वरी पुस्तकालयको प्राङ्गणमा देवकोटा, अर्याल र विकलको पूर्णकदको शालिक
कपन अनलाइन
काठमाडौं ,कार्तिक ३० ।
काठमाडौं राजधानीको कागेश्वरी मनहरा नगरपालिका वडा नं १ मा रहेको कागेश्वरी पुस्तकालयको प्राङ्गणमा महाकवि लक्ष्मीप्रसाद देवकोटा, हाँस्य शिरोमणि भैरव अर्याल र आख्यान शिरोमणि रमेश विकलको पूर्णकदको शालिक निर्माण कार्य पूरा भएको छ ।
देवकोटाको शालिक एक वर्ष अघि नै तयार गरिएपनि अर्याल र विकलको शालिक हालै तयार गरिएको हो । १ सय ११ औं लक्ष्मीजयन्तीका अवसरमा वरिष्ठ साहित्यकार एवम् नेपाल कम्युनिष्ट पार्टीका नेता प्रदीप नेपालले स्रष्टाहरुको शालिकमा माल्यार्पण गरेका थिए।
कागेश्वरी पुस्तकालयको व्यवस्थापन र आयोजनामा भएको कार्यक्रममा प्रतिनिधिसभाका सदस्य कृष्ण राई, बागमती प्रदेशका भौतिक पूर्वाधार विकासमन्त्री रामेश्वर फुयाल, कागेश्वरी मनोहरा नगरपालिकाका प्रमुख कृष्णहरी थापा,नेकपा काठमाडौंका कार्यालय सदस्य महेश्वर फुयाल लगायतको उपस्थिति थियो ।
आर्थिक वर्ष २०७५ र ७६ मा रु. ४० लाख विनियोजन गरेर शान्ति उद्यान र लक्ष्मीप्रसाद देवकोटा सालिक निर्माण गरिएको बागमती प्रदेशका पूर्वाधार विकास मन्त्रि फुयालले जानकारी दिएका छन। आर्थिक वर्ष २०७६ र ७७ मा २९ लाख विनियोजन गरेर बाँकी दुई साहित्यकारहरूको सालिक निर्माण गरिएको हो ।
१०९ औं लक्ष्मी जयन्तीका अवसरमा फुयाल सहित नेपाल प्रज्ञा प्रतिष्ठानका उपकुलपति गंगाप्रसाद उप्रेती र १ सय १ साहित्यकारहरुले रु. १ का दरले चन्दादान गरेर तीन जना साहित्यकारहरूको पूर्णकदको अष्टधातुको प्रतिमा निर्माणको शिलान्यास गरिएको थियो । स्मारकको निर्माण यही वर्ष सम्पन्न भएता पनि कोरोना महामारीको कारणले औपचारिक उद्घाटन नगरिएको फुयालले जानकारी दिएका छन ।
