रोजगार अनुमति प्रणाली (इपिएस) को परिक्षा २ र ३ गते

रोजगार अनुमति प्रणाली (इपिएस) अन्तर्गत रोजगारीका लागि कोरिया जान चाहेने युवाका लागि असोज २ (शनिबार) र ३ (आइतबार) मा हुने परीक्षाको तयारी पूरा भएको इपिएस शाखाले जनाएको  छ ।

उक्त परीक्षा इपिएस कोरिया शाखाले २ दिन दुई सिफ्टमा सञ्चालन गर्ने जनाएको छ । पहिलो सिफ्ट १० बजेदेखि र दोस्रो सिफ्ट २ः३० बजेदेखि हुने कोरिया शाखाले जनाएको छ । २ र ३ मा हुने भाषा परीक्षा उपत्यकाका फरकफरक १५ स्थान र पोखराको ३ स्थानमा परीक्षा सञ्चालन हुने शाखाले जनाएको छ । उपत्यकामा लिटिल एन्जल्स कलेज र स्कुल, हिमालयन ह्वाइट हाउस कलेज, एनकेसिंह मेमोरियल स्कुल, भिएस निकेतन कलेज, युनिभर्सल कलेज, रेडन कलेज, रेडियन्ट रिडर्स एकेडेमी, आइडियल मोडल स्कुल, एलआरआई स्कुल, ल्याबोरेटरी स्कुलमा परीक्षा केन्द्र तोकिएको छ । त्यस्तै जेभियर इन्टरनेसनल कलेज, ह्वाइट हाउस इन्स्टिच्युसन अफ साइन्स एन्ड टेक्नोलोजी र गोल्डेन गेट इन्टरनेसनल कलेजमा परीक्षा केन्द्र तोकिएको छ ।

पोखरामा भने लिटिल स्टेप हाइएर सेकेन्डरी स्कुल, स्टेप बाइ स्टेप हाइएर सेकेन्डरी स्कुल र ग्लोबल कलिजियट हाइएर सेकेन्डरी स्कुल परीक्षा केन्द्र तोकिएको छ ।

छैठौं कोरियन भाषा परीक्षामा सहभागी हुने परीक्षार्थीहरुले ध्यान दिनुपर्ने कुराहरु

१) परीक्षा दिन आउँदा आफ्ना साथमा नागरिकता वा राहदानीको सक्कलै प्रति र प्रवेशपत्र अनिवार्यरुपमा लिई आउनुपर्ने ।

२) आफ्नो परीक्षा कुन परीक्षा केन्द्रमा, कुन दिनको, कुन सिटमा परेको छ सो केन्द्र कुन स्थानमा रहेको छ एकिन गरी तोकिएको समयभन्दा अगावै परीक्षा केन्द्रमा पुगिसक्नु पर्ने । परीक्षाको लागि अभिमुखीकरण शुरु भएपछि परीक्षा केन्द्रमा प्रवेश गर्न पाइने छैन । परीक्षार्थीले ध्यान दिनुपर्ने महत्वपूर्ण कुराहरु अभिमुखीकरण तालीम मार्फत परीक्षा शुरु हुनु अगि जानकारी गराइने ।

३) परीक्षार्थीले परीक्षा हलमा टेपरेकर्ड, मोबाइल फोन, क्याल्कुलेटर लगायत विद्युतीय उपकरण साथमा लग्न पाइने छैन ।

४) परीक्षा केन्द्रमा प्रवेश गरेपछि आफ्नो सिम्बल नम्बर कुन भवनको कति नम्बर कोठामा परेको छ एकिन गरी जाने यस सम्बन्धमा कुनै समस्या परेमा तुरुन्त सोही केन्द्रको  Headquarter मा सम्पर्क गर्ने ।

५) विगत वर्षहरुमा केही स्थानमा अर्काको नाममा परीक्षा दिन खोज्ने परीक्षार्थीलाई पक्राउ गरिएकोले सम्बन्धित व्यक्ति वाहेक अन्य व्यक्ति अर्काको नाममा परीक्षा दिने उद्देश्यले प्रवेश गरेमा वा गर्न खोजेमा तत्काल पक्राउ गरी कानून बमोजिम कडा कारबाही गरिने छ ।

६) प्रत्येक परीक्षा कोठामा वितरण हुने Conformation Of Personal Information Sheet को अध्ययन गरी आफ्नो नाम थर, जन्म मिति आदि व्यक्तिगत विवरणमा केही गल्ती भेटी सच्याउनु पर्ने । तोकिएको स्थानमा शुद्धसँग लेखी (सच्चाई) दस्तखत गर्ने र नसच्याउनु पर्ने भए पनि दस्तखत महलमा दस्तखत गर्ने ।

७) परीक्षार्थीले उत्तर पुस्तिकामा चिन्ह लगाउँदा अनिवार्यरुपले कालो बलपेन प्रयोग गर्ने । कालो बाहेक अन्य रङ्गको मसी वा सिसाकलम प्रयोग गर्न पाईने छैन ।

८) कालो मसीले मिल्दो जवाफको वृत्तमा पूर्णरुपमा पोत्नुपर्ने आधा पोतेमा वा एकै प्रश्नमा एकभन्दा बढी स्थानमा मसी परेमा (पोतेमा) शून्य अंक प्रदान गरिने छ । एक पटक चिन्ह लगाइसकेपछि टिपेक्स लगाउन वा मेट्न पाइने छैन ।

९) परीक्षा हलमा प्रवेश गरेपछि परीक्षा समाप्त नभएसम्म शौचालयम जान वा परीक्षा कोठाबाट निस्कन पाइने छैन ।

१०) परीक्षा ७० (सत्तरी) मिनेटको हुनेछ । जसमा ४० मिनेटको पढाई ( Reading) र ३० मिनेटको सुनाई (Listening) हुनेछ ।

११) परीक्षा कोठाभित्र निर्धारित स्थानमा नबसी अन्यत्र बसेमा, दायाँ बायाँ हेर्ने वा सोध्ने गरेमा वा कुराकानी गरेमा, मोबाइल फोन वा निषेधित बस्तु प्रयोग गरेमा परीक्षामा अनियमित क्रियाकलाप मानी परीक्षा रद्द गरिने छ । यस सम्बन्धमा HRD कोरियाको निर्णय अन्तिम हुनेछ ।

१२) परीक्षा कोठाभित्र प्रश्न प्राप्त भएपछि प्रश्नपत्रको  Type र  Answer Sheet को  Type मिलेको छ छैन एकिन गर्नुपर्छ । नमिलेमा परीक्षा कोठामा रहेका Proctor (निरिक्षक) लाई तुरुन्त खबर गर्नुपर्दछ ।

१३) परीक्षा समाप्त भएपछि उत्तर पुस्तिका अधिकारीलाई बुझाएर मात्र परीक्षा हल छाड्नु पर्ने छ ।

१४) ईपीएस परीक्षालाई स्वच्छ, मर्यादित व्यवस्थित बनाउन सबैको सहयोगको लागि ई.पी.एस. कार्यालय र ईपीएस कोरिया सेन्टर नेपाल आग्रह गर्दछ ।

१५) विगतका बर्षमा अनियमितता गर्न खोज्ने ब्यक्तिहरु पक्राउ परी कारवाही भएको र यस बर्ष पनि परीक्षामा अनियमित गर्ने परीक्षार्थी उपर कडा निगरानी राखिने भएकोले अर्काको खेताला परीक्षार्थी बन्ने र बनाउने उपर कडा कारवाही गरीने भएको, ई.पी.एस कामदार भए निजको भिषा रद्द गरीने, CBT उम्मेदबार भए CBT परीक्षा दिन नपाउने ब्यवस्था हुने भएकोले सो परीक्षालाई मर्यादित र ब्यवस्थित बनाउन सम्पूर्ण परीक्षार्थीहरुलाई अनुरोध छ ।

१६) कोरियन भाषा परीक्षा उत्तिर्ण हुदैमा रोजगारीको ग्यारेण्टी नहुने भएकोले गरी आएको पेशा, ब्यवसाय, अध्ययन आदि नियमित गर्न हुन अनुरोध छ ।