डिसिएलाई महिला क्रिकेटको उपाधि
धनगढी, १७ जेठ । स्थानीय खेल मैदानमा केही दिनदेखि जारी महिला क्रिकेट प्रतियोगिताको उपाधि धनगढी क्रिकेट एकेडेमी (डिसिए) ले जितेको छ । आज भएको अन्तिम खेलमा क्यास्पियन एकेडेमी धनगढीलाई ८ विकेटले पराजित पार्दै डिसिएले उपाधिमाथि कब्जा जमाएको हो ।
टस जितेर पहिले ब्याटिङ रोजेको क्यास्पियनले १३.२ ओभरमा आफ्ना सबै विकेट गुमाएर २९ रन बनाएको थियो । क्यास्पियनका माया रेग्मीले बनाएको ७ रनको स्कोर सर्वाधिक बन्न पुग्यो । त्यस्तै पूजा चौधरी र सुस्मिता पाण्डेले समान २ रन जोडेका थिए ।
डिसिएकी कविता कुँवरले ४ विकेट लिएपछि क्यास्पियन सस्तैमा समेटिएको हो । त्यस्तै डिसिएकी चाँदनी शाह र कामना जोशीले समान २ विकेट लिएका थिए ।
जवाफी ब्याटिङ थालेको डिसिएले ३.४ ओभरमा लक्ष्य भेटाएको थियो । उसका लागि रुवी पौदारले नावाद १२ र कामना जोशीले ११ रन प्रहार गरेका थिए ।
प्रतियोगितामा ‘प्लेयर अफ टुर्नामेन्ट’को उपाधि डिसिएकी प्रतिमा सिंहले हात पारेकी छन् । उनले प्रतियोगिता भर १०५ रन र २ विकेट लिएकी थिइन् । त्यस्तै ‘राइजिङ प्लेयर’ क्यास्पियनकी सोनल भट्ट भइन् । रासस
