रक्सी पसलबाट ३ हाफ भाेड्का चोर्ने असईसहित तीन प्रहरी निलम्बित

कपन अनलाइन

सिराहा ,जेष्ठ १७।

रक्सी चोरेको आरोपमा प्रहरी सहायक निरीक्षक (असई) सहित ३ प्रहरी निलम्बनमा परेका छन्। निषेधाज्ञाको समयमा बन्द रहेको पसललबाट रक्सी चोरेको आरोप लागेपछि जिल्ला प्रहरी कार्यालय सिरहाले ३ प्रहरीलाई निलम्बन गरेको हो।

इलाका प्रहरी कार्यालय लहानमा कार्यरत असई नवल किशोर ठाकुर, प्रहरी जवानद्वय अन्नु कुमार राय र नरेशकुमार राय निलम्बनमा परेका सिरहाका प्रहरी प्रवक्ता डिएसपी शालिग्राम शर्माले जानकारी दिए। चोरीको आरोप लागेपछि उनीहरुलाई निलम्बन गरी अनुसन्धान सुरु गरिएको छ।

९ जेठमा लहान नगरपालिका–२३ गढिया चोकमा रहेको पूजा मदिरा पसलमा होहल्ला भइरहेको थाहा पाएपछि प्रहरी टोली पुगेको थियो। प्रहरीलाई देखेपछि पसल सञ्चालकसहित सबै भागे। त्यसपछि तिनै प्रहरीले पसलबाट रक्सी चोरेर चौकी फर्किएको सीसीटिभी क्यामरामा कैद भएको थियो।

प्रहरीले उक्त मदिरा पसलबाट भाेड्का नामको रक्सी चोरेको भिडियो यतिबेला सामाजिक सञ्जालमा भाइरल भएको छ। सीसीटिभी फुटेजमा उनीहरुले तीन हाफमात्र चोरेको देखिएको छ।

बर्दीीमा भएको बेला पसलबाट मदिरा चोरी गर्नु आचरण विपरित कार्य भएकाले उनीहरुलाई निलम्बन गरी अनुसन्धान थालिएको डिएसपी शर्माले बताए।